ដំណឹងល្អបំផុតសម្រាប់អ្នកគាំទ្រ! Barcelona រួចផុតពីសម្ពាធហិរញ្ញវត្ថុ ក្រោយ La Liga ដកបម្រាមរឹតត្បិតការចំណាយដ៏ធំ
អត្ថបទសរសេរដោយ Danny • 37 views
ក្លិបយក្សកាតាឡាន Barcelona ទទួលបានដំណឹងរីករាយបំផុតសម្រាប់ទីផ្សារដោះដូរកីឡាករនារដូវក្តៅនេះ បន្ទាប់ពីលីគកំពូលអេស្ប៉ាញ La Liga បានសម្រេចអនុញ្ញាតឱ្យម្ចាស់ជើងឯកលីគមួយនេះ ត្រលប់មកប្រើប្រាស់ច្បាប់ចំណាយ ១:១ (1:1 Spending Rule) ឡើងវិញ។ របត់ដ៏សំខាន់នេះបានបញ្ចប់រយៈពេលជាច្រើនឆ្នាំនៃការរឹតបន្តឹងផ្នែកហិរញ្ញវត្ថុដ៏តឹងរ៉ឹង ដែលធ្លាប់បានធ្វើឱ្យក្លិបជួបការលំបាកយ៉ាងខ្លាំងក្នុងការទិញដូរ និងចុះឈ្មោះកីឡាករថ្មីៗ។
តាមរយៈការផ្លាស់ប្តូរមកកាន់ច្បាប់ ១:១ នេះ Barcelona មានសិទ្ធិពេញលេញក្នុងការប្រើប្រាស់ថវិកាទាំងស្រុងដែលរកបានពីការលក់កីឡាករ ដើម្បីយកទៅវិនិយោគទិញកីឡាករថ្មីភ្លាមៗ (ខុសពីកាលពីមុន ដែលពួកគេអាចប្រើប្រាស់បានតែមួយភាគតូចប៉ុណ្ណោះ)។ ជាងនេះទៅទៀត ក្លិបក៏បានកាត់បន្ថយបន្ទុកប្រាក់ខែបានយ៉ាងច្រើន ពោលគឺសន្សំបានប្រហែល ៥៨ លានអឺរ៉ូ ពីការចាកចេញរបស់កីឡាករដែលមានប្រាក់ខែខ្ពស់ ដែលកត្តានេះបានជួយសម្រួលដល់ការនាំចូលខ្សែប្រយុទ្ធ Anthony Gordon និងបន្តបើកផ្លូវក្នុងការដេញថ្លៃយកកំពូលកីឡាករ Julian Alvarez ពីក្រុម Atletico Madrid ផងដែរ។
ទន្ទឹមនឹងការមានសេរីភាពក្នុងការចាយវាយ ប្រធានក្លិបលោក Joan Laporta ក៏បានធានាអះអាងដែរថា បញ្ហាចាក់ស្រែះក្នុងការចុះបញ្ជីឈ្មោះកីឡាករថ្មីៗឱ្យទាន់ពេលវេលាដែលធ្លាប់ជាការព្រួយបារម្ភរបស់អ្នកគាំទ្រកាលពីដងមុន នឹងលែងកើតមានទៀតហើយ។ បច្ចុប្បន្ន Barcelona មានសមត្ថភាពហិរញ្ញវត្ថុ និងរចនាសម្ព័ន្ធរដ្ឋបាលរឹងមាំគ្រប់គ្រាន់ ក្នុងការដឹកនាំទីផ្សារដោះដូរស្របតាមផែនការកីឡារបស់ខ្លួន។
