Arsenal ត្រៀមដេញថ្លៃ ៧០ លានផោនទិញយក Bruno Guimarães ទោះបីជា Newcastle United ប្រកាសជំហរក្តៅគគុកមិនចង់លក់ក៏ដោយ

សារព័ត៌មាន The Sun បានទម្លាយថា ក្លិប Arsenal កំពុងត្រៀមលក្ខណៈដាក់សំណើផ្លូវការក្នុងតម្លៃ ៧០ លានផោន ដើម្បីល្បងចិត្ត Newcastle United ក្នុងការទិញយកខ្សែបម្រើ Bruno Guimarães ថ្វីត្បិតតែក្រុម Magpies នៅតែជញ្ជក់មាត់ថានាយកក្រុមរូបនេះមិនមែនសម្រាប់លក់ក៏ដោយ។ លោក Mikel Arteta បានកំណត់យកកីឡាករជម្រើសជាតិប្រេស៊ីលរូបនេះជាគោលដៅអាទិភាពបំផុតដើម្បីមកពង្រឹងតំបន់បម្រើនៅរដូវក្តៅនេះ ហើយការដេញថ្លៃនេះនឹងក្លាយជាការបោះជំហានដ៏ធំបំផុតរបស់ Arsenal ក្នុងទីផ្សារដោះដូរកីឡាករ។

បន្ទាប់ពីការពិភាក្សាបឋមតាមរយៈតំណាងកីឡាករបានបង្ហាញថា Arsenal ត្រៀមផ្តល់ជូនប្រហែល ៦០ លានផោន ពេលនេះក្រុម Gunners បានដំឡើងតួលេខបន្ថែម ខណៈដែល Guimarães ខ្លួនឯងបានប្រាប់ទៅ Newcastle យ៉ាងច្បាស់ពីបំណងប្រាថ្នាចង់ផ្លាស់ទៅកាន់ Emirates Stadium។ ដោយសារជំហររបស់កីឡាករកាន់តែច្បាស់លាស់ ការចរចាត្រូវបានរំពឹងថានឹងមានភាពស្វិតស្វាញ និងលឿនជាងមុននៅក្នុងសប្តាហ៍នេះ ដើម្បីបញ្ចប់ការផ្ទេរដ៏ធំមួយនេះ។

ទោះបីជា Arsenal ចាប់ផ្តើមទីផ្សារដោះដូរកីឡាកររៀងយឺតបន្តិចក៏ដោយ ប៉ុន្តែពួកគេបានបិទបញ្ចប់កិច្ចព្រមព្រៀងនាំយកខ្សែប្រយុទ្ធស្លាប Christos Tzolis ពី Club Brugge ក្នុងតម្លៃ ៣៤ លានផោន រួមទាំងទិញផ្តាច់ខ្សែការពារ Piero Hincapie ក្នុងតម្លៃ ៣៤ លានផោនបន្ទាប់ពីខ្ចីជើងពី Bayer Leverkusen និងនាំយកអ្នកចាំទី Illan Meslier ដោយឥតគិតថ្លៃ។ ទោះជាយ៉ាងណា ពួកគេបានខកខានក្នុងការទិញយក Morgan Rogers បន្ទាប់ពី Chelsea បានទិញយកកីឡាករអង់គ្លេសរូបនេះក្នុងតម្លៃ ១១៧ លានផោន។

ប្រភពដដែលបានបន្ថែមថា Arsenal នៅតែមានគោលដៅនាំយកខ្សែការពារ ខ្សែបម្រើ និងខ្សែប្រយុទ្ធបន្ថែមទៀតមុនពេលទីផ្សារដោះដូរកីឡាករត្រូវបានបិទ។ Ezri Konsa ស្ថិតក្នុងចំណោមគោលដៅតំបន់ការពារ បន្ទាប់ពី William Saliba រងរបួសខ្នងដែលត្រូវសម្រាកព្យាបាលជាច្រើនខែ ខណៈដែល John Stones ដែលជាកីឡាករឥតគិតថ្លៃក៏កំពុងត្រូវបានពិចារណាផងដែរ។ ឯតំបន់ប្រយុទ្ធវិញ Julián Álvarez នៅតែជាកីឡាករដែលលោក Arteta ពេញចិត្ត ទោះជា Atlético Madrid បញ្ជាក់ថាមិនលក់ក៏ដោយ ហើយ Bradley Barcola ក៏ជាជម្រើសមួយទៀត ថ្វីបើ Liverpool កំពុងមានប្រៀបជាងគេក្នុងការទិញយកខ្សែប្រយុទ្ធ Paris Saint-Germain រូបនេះក៏ដោយ។