Anthony Gordon លើកសរសើរ Harry Kane ថាមានសមត្ថភាពខ្ពស់ស្មើនឹងវីរៈបុរស Lionel Messi
អត្ថបទសរសេរដោយ Danny • 45 views
ខ្សែប្រយុទ្ធស្លាបក្រុមជម្រើសជាតិអង់គ្លេស កីឡាករ Anthony Gordon បានសម្តែងការកោតសរសើរយ៉ាងខ្លាំងចំពោះមិត្តរួមក្រុម Harry Kane ដោយអះអាងថា ប្រធានក្រុមរូបនេះកំពុងបង្ហាញទម្រង់លេងយ៉ាងមានប្រសិទ្ធភាពក្នុងកម្រិតខ្ពស់បំផុតដែលអាចប្រៀបធៀបទៅនឹងកំពូលកីឡាករ Lionel Messi បាន។ ការលើកឡើងនេះធ្វើឡើងបន្ទាប់ពី Kane រកបាន ២ គ្រាប់ម្នាក់ឯងនៅចុងម៉ោង ជួយឱ្យអង់គ្លេសវាយបកឈ្នះសាធារណរដ្ឋប្រជាធិបតេយ្យកុងហ្គោ ២-១ យ៉ាងរំភើបក្នុងពានរង្វាន់ World Cup ២០២៦។
កីឡាករ Gordon ដែលជាអ្នកបញ្ជូនបាល់ (Assists) ឱ្យ Kane ស៊ុតបញ្ចូលទីទាំងពីរគ្រាប់ក្រោយប្តូរចូលពីកៅអីបម្រុង បានថ្លែងថា៖ «វាជារឿងដ៏អស្ចារ្យបំផុតដែលបាននៅក្បែររូបគេរាល់ថ្ងៃ។ គេកំពុងមានរដូវកាលដ៏ល្អបំផុតមួយ ដែលមានតែ Lionel Messi ម្នាក់គត់ធ្លាប់ធ្វើបានល្អជាងនេះ។ នេះបញ្ជាក់ឱ្យឃើញពីកម្រិតលេងដ៏ខ្ពស់របស់គេ»។ រូបគេបានបន្ថែមទៀតថា សមិទ្ធផលទាំងនេះមិនមែនជារឿងចៃដន្យឡើយ ប៉ុន្តែវាជាលទ្ធផលនៃការខិតខំប្រឹងប្រែងហ្វឹកហាត់ដោយយកចិត្តទុកដាក់ និងភាពម៉ត់ចត់បំផុតរបស់ Kane ទោះបីជាបច្ចុប្បន្នមានវ័យ ៣២ ឆ្នាំហើយក៏ដោយ។
គួរបញ្ជាក់ផងដែរថា ២ គ្រាប់ដ៏សំខាន់នេះបានធ្វើឱ្យ Harry Kane ឡើងទៅគ្រងតំណែងអ្នកស៊ុតបញ្ចូលទីបាន ៥ គ្រាប់ក្នុងព្រឹត្តិការណ៍នេះ ស្មើជាមួយកីឡាករ Erling Haaland និងតាមពីក្រោយ Lionel Messi ព្រមទាំង Kylian Mbappe តែ ១ គ្រាប់ប៉ុណ្ណោះក្នុងតារាងប្រជែងពានរង្វាន់ស្បែកជើងមាស (Golden Boot)។ បើគិតក្នុងកម្រិតក្លិបអាជីពនាស្របពេលជាមួយគ្នានេះ រូបគេក៏ទើបតែបានកសាងប្រវត្តិសាស្ត្សដ៏អស្ចារ្យជាមួយក្លិប Bayern Munich ដោយរកបាន ៦១ គ្រាប់ ក្នុងការប្រកួតចំនួន ៥១ លើកផងដែរ។
បន្ទាប់ពីឆ្លងកាត់ការប្រកួតដ៏តានតឹងនេះ ក្រុមជម្រើសជាតិអង់គ្លេសត្រូវត្រៀមខ្លួនប្រឈមមុខនឹងក្រុមម្ចាស់ផ្ទះម៉ិកស៊ិក (Mexico) នៅក្នុងវគ្គ ១៦ ក្រុមចុងក្រោយ នៅកីឡដ្ឋាន Azteca ដោយរំពឹងថានឹងអាចបន្តដំណើរទៅកាន់វគ្គបន្តដើម្បីជួបក្រុមឈ្នះរវាង ប្រេស៊ីល ឬ ន័រវែស។
