សត្វខ្យងសមុទ្រឥតសំបកតូចមួយប្រភេទ ត្រូវបានដាក់ឈ្មោះថា Aldisa vozinhai ដើម្បីជាការអរគុណដល់ប្រជាជន និងវីរៈបុរសអ្នកចាំទីរបស់ Cape Verde

អ្នកចាំទីវ័យចាស់របស់ក្រុមជម្រើសជាតិ Cape Verde កីឡាករ Vozinha ទទួលបានកិត្តិយសដ៏ប្លែក និងកម្រមួយ បន្ទាប់ពីអ្នកស្រាវជ្រាវសញ្ជាតិអេស្ប៉ាញ លោក Jesus Ortea បានសម្រេចចិត្តយកឈ្មោះរបស់លោក ទៅដាក់ឱ្យសត្វខ្យងសមុទ្រ (ឥតសំបក) ប្រភេទថ្មីមួយដែលទើបតែរកឃើញ។ ការផ្តល់កិត្តិយសនេះ ធ្វើឡើងបន្ទាប់ពីអ្នកចាំទីរូបនេះធ្វើបានយ៉ាងល្អអស្ចារ្យ ក្នុងការជួយក្រុមជាតិបង្កើតប្រវត្តិសាស្ត្រឡើងមកលេង World Cup ជាលើកដំបូង។

តាមការចុះផ្សាយរបស់សារព័ត៌មាន The Athletic បានឱ្យដឹងថា សត្វសមុទ្រប្រភេទថ្មីនេះ មានឈ្មោះជាវិទ្យាសាស្ត្រថា Aldisa vozinhai វាជាប្រភេទសត្វខ្យងសមុទ្រឥតសំបក ពណ៌ក្រហម មានទំហំតូចត្រឹមតែ 4 មីលីម៉ែត្រប៉ុណ្ណោះ ដែលគេបានរកឃើញវានៅតំបន់សមុទ្រការីបៀន ក្បែរប្រទេសគុយបា។ លោក Ortea ដែលជាសាស្ត្រាចារ្យសាកលវិទ្យាល័យ បានជ្រើសរើសពេលប្រកាសឈ្មោះនេះ ឱ្យចំពេលប្រកួត World Cup តែម្តង ដើម្បីជាការអបអរសាទរដល់ Vozinha ដែលបានជួយក្រុមស្មើជាមួយក្រុមខ្លាំងអេស្ប៉ាញ 0-0 ដោយរូបលោកសង្គ្រោះបាល់បានរហូតដល់ទៅ 7 ដងម្នាក់ឯង។ នេះមិនមែនជាលើកទីមួយទេ ដែលលោក Ortea យកឈ្មោះអ្នកចាំទីមកដាក់ឱ្យសត្វសមុទ្រ ពោលគឺកាលពីឆ្នាំ 2019 លោកក៏ធ្លាប់បានយកឈ្មោះអតីតអ្នកចាំទី Real Madrid គឺ Keylor Navas ទៅដាក់ឱ្យខ្យងសមុទ្រតូចមួយប្រភេទផងដែរ។

នៅក្នុងព្រឹត្តិការណ៍ World Cup ឆ្នាំ 2026 នេះ លោក Vozinha បានបង្កើតកំណត់ត្រាក្លាយជាកីឡាករដែលមានអាយុច្រើនជាងគេ (40 ឆ្នាំ និង 12 ថ្ងៃ) ដែលបានចូលលេងក្នុងការប្រកួតបើកឆាកដំបូងបង្អស់របស់ប្រទេសជាតិក្នុងពានរង្វាន់ពិភពលោក។ ភាពល្បីល្បាញរបស់លោកបានហក់ឡើងយ៉ាងខ្លាំង ដោយចំនួនអ្នកតាមដាន (Followers) លើគណនី Instagram របស់លោក បានកើនឡើងពី 50,000 នាក់ ឡើងរហូតដល់ទៅ 28.5 លាននាក់ ក្នុងអំឡុងពេលប្រកួត។ លោក Vozinha បានចូលលេងទាំង 4 ប្រកួតឱ្យ Cape Verde ដោយជួយក្រុមឡើងដល់វគ្គ 32 ក្រុមចុងក្រោយ និងធ្វើបានយ៉ាងល្អក្នុងប្រកួតចាញ់អាហ្សង់ទីន 3-2 ក្នុងវគ្គបន្ថែមម៉ោង។