សម្ព័ន្ធភាព ៣ ប្រទេសបានដាក់ពាក្យដេញថ្លៃផ្លូវការដើម្បីធ្វើម្ចាស់ផ្ទះពានរង្វាន់ Africa Cup of Nations

ប្រទេស Burkina Faso, Mali និង Niger បានដាក់ពាក្យសុំធ្វើម្ចាស់ផ្ទះរួមគ្នាផ្លូវការសម្រាប់ព្រឹត្តិការណ៍ Africa Cup of Nations (AFCON) 2032។ នេះបើយោងតាមការបញ្ជាក់ពីសហព័ន្ធបាល់ទាត់ប្រទេស Niger ហើយប្រទេសទាំងបីនេះបានក្លាយជាបេក្ខភាពផ្លូវការដំបូងគេបង្អស់សម្រាប់ព្រឹត្តិការណ៍នា ៦ ឆ្នាំខាងមុខ។

ការអនុម័តពី CAF និងបេក្ខភាពសេនេហ្គាល់៖ សហព័ន្ធបាល់ទាត់ Niger បានប្រកាសថា សហព័ន្ធបាល់ទាត់ទ្វីបអាហ្វ្រិក (CAF) បានទទួលស្គាល់ និងអនុម័តលើពាក្យស្នើសុំធ្វើម្ចាស់ផ្ទះរួមគ្នារបស់ប្រទេសទាំងបី (ដែលស្ថិតក្នុងសម្ព័ន្ធភាពបណ្តាប្រទេស Sahel - AES) រួចរាល់ហើយ។ ទន្ទឹមនឹងនេះ ប្រទេសសេនេហ្គាល់ក៏អាចនឹងចូលរួមប្រជែងធ្វើម្ចាស់ផ្ទះក្នុងឆ្នាំ ២០៣២ នេះដែរ បន្ទាប់ពីអតីតរដ្ឋមន្ត្រីក្រសួងកីឡារបស់ពួកគេបានបង្ហាញការចាប់អារម្មណ៍កាលពីខែឧសភាកន្លងទៅ។

លីប៊ី ដាក់ពាក្យធ្វើម្ចាស់ផ្ទះ AFCON 2028៖ ដោយឡែក ប្រទេសលីប៊ីបានប្រកាសដាក់ពាក្យប្រជែងធ្វើម្ចាស់ផ្ទះ AFCON 2028 ដែលជាព្រឹត្តិការណ៍ចុងក្រោយបង្អស់ មុនពេល AFCON ដូរការរៀបចំមកធ្វើឡើងរៀងរាល់ ៤ ឆ្នាំម្តងវិញ។ ការដាក់ពាក្យរបស់លីប៊ីបានធ្វើឱ្យមានការភ្ញាក់ផ្អើលយ៉ាងខ្លាំង ខណៈដែលប្រទេសមួយចំនួនទៀតដូចជា អេហ្ស៊ីប, អាហ្វ្រិកខាងត្បូង ផ្គួបជាមួយបុតស្វាន៉ា, និងអេត្យូពី សុទ្ធតែធ្លាប់បានសម្តែងបំណងចង់ធ្វើម្ចាស់ផ្ទះ ប៉ុន្តែមិនទាន់បានដាក់ពាក្យផ្លូវការនៅឡើយ។