លោក Zlatan Ibrahimovic ចង់បានខ្សែការពារ Virgil van Dijk មកដឹកនាំតំបន់ការពារឱ្យ AC Milan
អត្ថបទសរសេរដោយ Danny • 53 views
ក្លិបឆ្នូតក្រហមខ្មៅ AC Milan បានកំណត់មុខសញ្ញាយកប្រធានក្រុម Liverpool កីឡាករ Virgil van Dijk មកធ្វើជាគោលដៅសំខាន់ក្នុងការនាំចូលមកពង្រឹងតំបន់ការពារនារដូវក្តៅនេះ ភ្លាមៗបន្ទាប់ពីបានបញ្ចប់កិច្ចសន្យាទិញយកខ្សែប្រយុទ្ធ Goncalo Ramos ក្នុងតម្លៃ ៧០ លានអឺរ៉ូ។ លោក Zlatan Ibrahimovic ដែលជាទីប្រឹក្សាជាន់ខ្ពស់របស់ក្លិប គឺជាអ្នកជំរុញដ៏សំខាន់ក្នុងការនាំយកខ្សែការពារកណ្តាលលំដាប់ពិភពលោករូបនេះ ដើម្បីមកធ្វើជាមេដឹកនាំក្នុងយុគសម័យថ្មីក្រោមការដឹកនាំរបស់គ្រូបង្វឹកលោក Ruben Amorim។
យោងតាមការចុះផ្សាយរបស់សារព័ត៌មាន La Gazzetta dello Sport ក្រុមហ៊ុន RedBird ដែលជាម្ចាស់ក្លិប AC Milan កំពុងវាយតម្លៃលើលទ្ធភាពហិរញ្ញវត្ថុក្នុងការដេញថ្លៃជាផ្លូវការមួយ ខណៈដែល Van Dijk កំពុងស្ថិតក្នុងឆ្នាំចុងក្រោយនៃកិច្ចសន្យារបស់គេជាមួយ Liverpool។ ខាងភាគីអ៊ីតាលីសង្ឃឹមថានឹងអាចឆ្លៀតឱកាសយកចំណេញបាន ព្រោះក្លិបហង្សក្រហមកំពុងស្ថិតក្នុងដំណាក់កាលផ្លាស់ប្តូរទម្រង់ក្រុមធំធេង បន្ទាប់ពីការចាកចេញរបស់វីរៈបុរស Mohamed Salah និង Andrew Robertson។
ទោះជាយ៉ាងណាក៏ដោយ ការផ្ទេរនេះអាចនឹងជួបឧបសគ្គធំ ដោយសារតែ Liverpool ទើបតែបានបាត់បង់ខ្សែការពារ Ibrahima Konate ទៅឱ្យក្រុមអធិរាជស Real Madrid ដោយគ្មានតម្លៃខ្លួន (Free Transfer) រួចទៅហើយ ដូច្នេះពួកគេអាចនឹងប្រឆាំងដាច់ខាតក្នុងការបណ្តោយឱ្យប្រធានក្រុមដ៏សំខាន់ម្នាក់ទៀតចាកចេញពីទឹកដី Anfield។
បើក្រឡេកទៅមើលបញ្ហាកាយសម្បទា និងអារម្មណ៍វិញ ខ្សែការពារហូឡង់រូបនេះទើបតែបានជួបការខកចិត្តយ៉ាងខ្លាំងក្នុងព្រឹត្តិការណ៍ World Cup 2026 បន្ទាប់ពីក្រុមជម្រើសជាតិហូឡង់ (Netherlands) ត្រូវធ្លាក់ក្នុងវគ្គ ៣២ ក្រុមចុងក្រោយក្រោមស្នាដៃក្រុមម៉ារ៉ុក ដោយសារការទាត់បាល់កាត់សេចក្តីប៉េណាល់ទី។ ប្រសិនបើការចរចាទិញយក Van Dijk មិនអាចទៅរួចទេនោះ AC Milan បានត្រៀមផែនការបម្រុងរួចជាស្រេចក្នុងការទិញយកកីឡាករ Goncalo Inacio របស់ក្លិប Sporting CP ក្នុងតម្លៃ ៤០ លានអឺរ៉ូជំនួសវិញ។
