លោក Roberto De Zerbi កំពុងជម្រុញឱ្យ Spurs ហ៊ានចំណាយធំលើប្រាក់ខែដើម្បីឆក់យកគ្រាប់ពេជ្រ Marcus Rashford ពី Man United
អត្ថបទសរសេរដោយ Danny • 71 views
យោងតាមការចុះផ្សាយពីសារព័ត៌មានដ៏ល្បីល្បាញ The Sun បានឱ្យដឹងថា ក្លិបខ្នាយមាស Tottenham Hotspur ត្រូវបានរាយការណ៍ថា បានត្រៀមខ្លួនរួចជាស្រេចក្នុងការបំពេញតាមតម្រូវការប្រាក់ឈ្នួលដ៏ខ្ពស់កប់ពពក រហូតដល់ទៅ £325,000 ក្នុងមួយសប្តាហ៍ ដើម្បីបញ្ចុះបញ្ចូលខ្សែប្រយុទ្ធ Marcus Rashford ឱ្យផ្ទេរមកកាន់ទឹកដី Tottenham Hotspur Stadium នារដូវក្តៅនេះ។
ខ្សែប្រយុទ្ធស្លាបសញ្ជាតិអង់គ្លេសវ័យ ២៨ ឆ្នាំរូបនេះ ទើបតែត្រលប់មកកាន់ក្លិបបិសាចក្រហម Manchester United វិញ បន្ទាប់ពីបញ្ចប់ភារកិច្ចក្នុងកិច្ចសន្យាខ្ចីជើងពេញមួយរដូវកាលជាមួយក្លិបអ្នកមានបុណ្យ Barcelona។ ទោះជាយ៉ាងណា អនាគតរបស់គេនៅទឹកដី Old Trafford ហាក់ដូចជាត្រូវបានបញ្ចប់ទៅហើយ ដោយសារក្លិបចង់កាត់បន្ថយបន្ទុកប្រាក់ខែដ៏មហិមា ដើម្បីបើកផ្លូវក្នុងការនាំចូលខ្សែប្រយុទ្ធថ្មី និងទុកតំណែងកីឡាករដែលទទួលបានប្រាក់ខែខ្ពស់ជាងគេជូនទៅប្រធានក្រុម Bruno Fernandes។
បច្ចុប្បន្ន ប្រាក់ខែរបស់ Rashford នឹងត្រូវកើនឡើងពី £300,000 ដល់ £325,000 ក្នុងមួយសប្តាហ៍ក្នុងខែបន្ទាប់នេះ ដោយសារលក្ខខណ្ឌនៃការត្រលប់ទៅលេងពានរង្វាន់ Champions League របស់ Man United។ ខណៈពេលដែល Spurs មិនមានបញ្ហាចោទចំពោះរឿងប្រាក់សប្តាហ៍របស់កីឡាករ ប៉ុន្តែពួកគេនៅតែមានភាពរារែកក្នុងការចំណាយលុយផ្តាច់កិច្ចសន្យា (Release Clause) ចំនួន £40 លានផោនទាំងស្រុង ដោយសង្ឃឹមថានឹងអាចចរចាទម្លាក់តម្លៃខ្លួនមកទាបជាងនេះ។
ទោះជាយ៉ាងណាក៏ដោយ ឧបសគ្គដ៏ធំមួយទៀតសម្រាប់ Spurs គឺចិត្តរបស់សាមីខ្លួនផ្ទាល់។ Marcus Rashford ត្រូវបានគេរាយការណ៍ថា មិនសូវមានចំណាប់អារម្មណ៍ក្នុងការផ្ទេរទៅកាន់ក្លិបផ្សេងទៀតនៅក្នុងក្របខណ្ឌ Premier League ឡើយ ដោយរូបគេ ប្រាថ្នាចង់ផ្ទេរទៅលេងនៅបរទេសបន្តទៀត ដូចជាការចង់ត្រលប់ទៅទឹកដី Camp Nou ជាអចិន្ត្រៃយ៍ ឬការផ្លាស់ទៅចូលរួមជាមួយយក្សអាល្លឺម៉ង់ Bayern Munich ដែលកំពុងតាមសម្លឹងមើលស្ថានភាពរបស់គេដូចគ្នា។
