Real Madrid និង José Mourinho សម្រេចចិត្តរក្សា Endrick នៅក្លិប ជំនួសការផ្ញើខ្ចីជើងបន្តទៀត

អនាគតរបស់ខ្សែប្រយុទ្ធវ័យក្មេងសញ្ជាតិប្រេស៊ីល កីឡាករ Endrick ជាមួយក្លិបអធិរាជស Real Madrid ត្រូវបានកំណត់យ៉ាងច្បាស់លាស់ មុនពេលរដូវកាលថ្មីចាប់ផ្តើម។ បន្ទាប់ពីបានចំណាយពេលពាក់កណ្តាលរដូវកាលមុនក្នុងការទៅលេងឱ្យក្លិប Lyon ក្នុងលក្ខខណ្ឌខ្ចីជើងរួចមក ពេលនេះរូបគេត្រូវបានរំពឹងថានឹងបន្តស្នាក់នៅទឹកដី Santiago Bernabeu ដើម្បីប្រជែងតំណែងលេងក្រោមការដឹកនាំរបស់លោកគ្រូបង្វឹក Jose Mourinho។

យោងតាមរបាយការណ៍ចុងក្រោយពីសារព័ត៌មាន Marca បានឱ្យដឹងថា ទោះបីជាមានការលេចឮព័ត៌មានពីការចង់ដាក់ឱ្យរូបគេទៅលេងនៅក្លិបផ្សេងក្នុងលក្ខខណ្ឌខ្ចីជើងបន្ថែមដើម្បីពង្រឹងសមត្ថភាពក្តី ប៉ុន្តែ Real Madrid មិនមានបំណងបញ្ជូនកីឡាករវ័យ ១៩ ឆ្នាំរូបនេះទៅណាទៀតឡើយ។ ផ្ទុយទៅវិញ ថ្នាក់ដឹកនាំក្លិបយល់ថា នេះជាពេលវេលាដ៏សមស្របមួយសម្រាប់ Endrick ក្នុងការបង្ហាញខ្លួន និងបង្កើតឥទ្ធិពលនៅក្នុងក្រុមធំ។

ទាំងខាងក្លិប និងសាមីខ្លួនកីឡាករផ្ទាល់ សុទ្ធតែមានទស្សនវិស័យស្របគ្នាចំពោះផែនការមួយនេះ។ បន្ទាប់ពីទទួលបានបទពិសោធន៍ដ៏មានតម្លៃនៅក្នុងលីគកំពូលបារាំង (Ligue 1) ជាមួយ Lyon ដោយរកបានគ្រាប់បាល់ ៨ គ្រាប់ និងបញ្ជូនបាល់ឱ្យមិត្តរួមក្រុមបាន ៨ លើក ក្នុងការបង្ហាញខ្លួន ២១ ប្រកួត រូបគេនឹងត្រូវត្រឡប់មកចូលរួមការហ្វឹកហាត់កម្តៅសាច់ដុំមុនរដូវកាល (Pre-season) ជាមួយលោក Mourinho។ Endrick ខ្លួនឯងក៏ជឿជាក់ដែរថា ខ្លួនមានភាពចាស់ទុំគ្រប់គ្រាន់ក្នុងការប្រកួតប្រជែងជាមួយកីឡាករនៅក្នុងក្រុម។

គ្រូបង្វឹកសញ្ជាតិព័រទុយហ្គាល់ លោក Jose Mourinho បានមើលឃើញថា កាយសម្បទារឹងមាំ ល្បឿនលឿន និងសមត្ថភាពសម្រុកដ៏មុតស្រួចរបស់ Endrick នឹងក្លាយជាអាវុធដ៏សំខាន់មួយសម្រាប់លោកក្នុងការរៀបចំតំបន់ប្រយុទ្ធឡើងវិញ បន្ទាប់ពីក្លិបបានខកខានពានរង្វាន់អស់រយៈពេលពីររដូវកាលកន្លងមក។

ទោះជាយ៉ាងណា ការស្វែងរកឱកាសចូលលេងឱ្យបានទៀងទាត់ មិនមែនជារឿងងាយស្រួលឡើយសម្រាប់រូបគេ ព្រោះត្រូវប្រកួតប្រជែងជាមួយកីឡាករមានសមត្ថភាពខ្ពស់ដទៃទៀតដូចជា Brahim Diaz និង Franco Mastantuono ជាដើម។ លើសពីនេះ ក្រុមការងារតំបន់ប្រយុទ្ធក៏នឹងរង់ចាំការត្រឡប់មកវិញរបស់ខ្សែប្រយុទ្ធ Rodrygo ដែលកំពុងស្ថិតក្នុងដំណាក់កាលស្តាររបួសសរសៃពួរជង្គង់ (ACL) ផងដែរ។

ជាមួយនឹងកិច្ចសន្យាដែលមានសុពលភាពរហូតដល់ឆ្នាំ ២០៣០ ក្លិប Real Madrid នៅតែចាត់ទុក Endrick ជាទ្រព្យសម្បត្តិដ៏មានតម្លៃបំផុតទាំងសម្រាប់បច្ចុប្បន្ន និងអនាគតរបស់ក្លិប។