ប្រធានក្រុមអ៊ីរ៉ង់ Mehdi Taremi វាយប្រហារ FIFA ចំៗថាជា ព្រឹត្តិការណ៍ World Cup ដ៏ខកចិត្ត
អត្ថបទសរសេរដោយ Danny • 54 views
ប្រធានក្រុមជម្រើសជាតិអ៊ីរ៉ង់ កីឡាករ Mehdi Taremi បានចេញមុខរិះគន់ស្ថាប័ន FIFA និងប្រធានសហព័ន្ធ លោក Gianni Infantino យ៉ាងចាស់ដៃ ដោយបានហៅព្រឹត្តិការណ៍ World Cup 2026 នេះថាជា «មហន្តរាយ» ព្រមទាំងបានចោទប្រកាន់អ្នករៀបចំការប្រកួតថា បានបរាជ័យក្នុងការដោះស្រាយបញ្ហាឡូជីស្ទីក និងបញ្ហាទិដ្ឋាការ (Visa)។ ទន្ទឹមនឹងនេះ លោកគ្រូបង្វឹក Amir Ghalenoei ក៏បានអំពាវនាវឱ្យ FIFA ហ៊ានក្រោកឈរតតាំងជាមួយប្រទេសម្ចាស់ផ្ទះ ជុំវិញការប្រព្រឹត្តមិនស្មើភាពមកលើក្រុមរបស់លោកផងដែរ។
ភាពរកាំរកូសនៅក្រៅទីលាន បានបិទបាំងលើលទ្ធផលស្មើដ៏លំបាករបស់អ៊ីរ៉ង់ទល់នឹងក្រុមអេស៊ីប (Egypt) បន្ទាប់ពី Taremi បានទម្លាយប្រាប់សារព័ត៌មាន The Athletic ទាំងក្តៅក្រហាយថា ក្រុមរបស់លោកខ្វះខាតទាំងបុគ្គលិកផ្នែកស្តារកាយសម្បទា (Recovery) និងផ្នែកឡូជីស្ទីក រហូតដល់ទៅ ១១ នាក់ ដោយសារខាងម្ចាស់ផ្ទះមិនព្រមផ្តល់ទិដ្ឋាការឱ្យ។ លើសពីនេះ ក្រុមទាំងមូលត្រូវបង្ខំចិត្តធ្វើដំណើរទៅមកយ៉ាងលំបាករវាងទីក្រុង Tijuana ប្រទេសម៉ិកស៊ិក និងកន្លែងប្រកួតនៅក្នុងសហរដ្ឋអាមេរិក។
Taremi បានបញ្ជាក់ថា៖ «វាជា World Cup ដ៏មហន្តរាយបំផុត! លោក Infantino ធ្លាប់បានដើរចូលមកបន្ទប់ផ្លាស់សម្លៀកបំពាក់របស់យើងក្រោយប្រកួតជាមួយនូវែលសេឡង់ (New Zealand) ហើយប្រាប់ថានេះគ្រាន់តែជាការចាប់ផ្តើម។ ប៉ុន្តែរហូតមកដល់ពេលនេះ ពួកគេនៅតែមិនអាចដោះស្រាយបញ្ហាឱ្យយើងបានដដែល។ វាអយុត្តិធម៌ណាស់សម្រាប់ពួកយើង បើពួកគេចង់ឱ្យយើងធ្លាក់ ចូរប្រាប់មក យើងនឹងដើរចេញ»។
ចំណែកឯលោកគ្រូបង្វឹក Ghalenoei ក៏បានបង្ហាញការមិនពេញចិត្តយ៉ាងខ្លាំងចំពោះសហរដ្ឋអាមេរិក (USA) ក្នុងនាមជាម្ចាស់ផ្ទះរួម។ ដោយសារតែជម្លោះយោធារវាងសហរដ្ឋអាមេរិក និងអ៊ីរ៉ង់ ក្រុមបាល់ទាត់អ៊ីរ៉ង់ត្រូវបានបង្ខំចិត្តប្តូរទីតាំងហ្វឹកហាត់ពីបន្ទាយរដ្ឋ Arizona មកកាន់ប្រទេសម៉ិកស៊ិកវិញភ្លាមៗ មុនពេលព្រឹត្តិការណ៍ចាប់ផ្តើម ដែលនេះបានធ្វើឱ្យប៉ះពាល់ដល់កាយសម្បទារបស់កីឡាករយ៉ាងធ្ងន់ធ្ងរ។
លោក Ghalenoei បានថ្លែងប្រាប់សារព័ត៌មាន The Guardian ថា៖ «ពួកគេមិនអនុញ្ញាតឱ្យយើងមកដល់មុន ២ សប្តាហ៍ ហើយថែមទាំងរឹតត្បិតមិនឱ្យយើងចូលទីលាន ២ ថ្ងៃមុនការប្រកួតទៀត។ ទោះបីជាមានឧបសគ្គ និងការរារាំងជាច្រើនដែលពួកគេដាក់នៅពីមុខយើងក្តី ប៉ុន្តែកីឡាកររបស់យើងនៅតែអាចធ្វើបានល្អ ហើយពិភពលោកពិតជាមានមោទនភាពចំពោះប្រជាជនអ៊ីរ៉ង់ និងក្រុមរបស់យើងខ្លាំងណាស់»។
ទោះបីជាជួបបញ្ហាចម្រូងចម្រាសក្រៅទីលានយ៉ាងណាក៏ដោយ ក្រុមជម្រើសជាតិអ៊ីរ៉ង់នៅតែមានឱកាសគណនាតាមគណិតវិទ្យា ក្នុងការឈានទៅកាន់វគ្គ ៣២ ក្រុមចុងក្រោយ ក្នុងនាមជាក្រុមលេខ ៣ ដែលមាន លទ្ធផលប្រកួតល្អបំផុតមួយ ដោយរង់ចាំមើលលទ្ធផលនៃការប្រកួតដែលនៅសេសសល់ក្នុងពូលដទៃទៀត។
