ក្លិប Manchester United បញ្ជាក់ពីស្ថានភាពរបួសសរសៃពួរជង្គង់របស់ខ្សែបម្រើ Manuel Ugarte
អត្ថបទសរសេរដោយ Danny • 46 views
ក្លិបបិសាចក្រហម Manchester United បានចេញសេចក្តីថ្លែងការណ៍ផ្លូវការមួយ ដោយបញ្ជាក់ថា ខ្សែបម្រើ Manuel Ugarte បានរងរបួសសរសៃពួរជង្គង់ (Knee ligament injury) អំឡុងពេលបំពេញកាតព្វកិច្ចជូនក្រុមជម្រើសជាតិអ៊ុយរ៉ូហ្គាយ នៅក្នុងការប្រកួតទល់នឹងក្រុមជម្រើសជាតិអេស្ប៉ាញ (Spain) កាលពីថ្ងៃសុក្រ។ បច្ចុប្បន្ន ក្រុមគ្រូពេទ្យរបស់ក្លិបកំពុងធ្វើការវាយតម្លៃបន្ថែម ដើម្បីកំណត់ពីពេលវេលាច្បាស់លាស់ក្នុងការសម្រាកព្យាបាល និងស្តារកាយសម្បទារបស់រូបគេឡើងវិញ។
នៅក្នុងសេចក្តីថ្លែងការណ៍នោះ ក្លិបបានលើកឡើងថា៖ «ក្លិប Manchester United សូមបញ្ជាក់ថា កីឡាករ Manuel Ugarte បានរងរបួសសរសៃពួរជង្គង់ ពេលលេងឱ្យក្រុមជម្រើសជាតិអ៊ុយរ៉ូហ្គាយ ក្នុងការប្រកួតវគ្គចែកពូល World Cup កាលពីថ្ងៃសុក្រកន្លងទៅ។ ដំណើរការពិនិត្យរបួសកំពុងត្រូវបានធ្វើឡើងជាបន្តបន្ទាប់ ដើម្បីស្វែងរកវិធីសាស្ត្រព្យាបាល និងកំណត់រយៈពេលស្តារនីតិសម្បទាដ៏ល្អបំផុត។ ពួកយើងទាំងអស់គ្នាសូមជូនពរឱ្យ Manuel ឆាប់ជាសះស្បើយ និងត្រៀមខ្លួនគាំទ្ររូបគេគ្រប់ជំហាន»។
ហេតុការណ៍ដ៏គួរឱ្យសោកស្តាយនេះ បានកើតឡើងនៅនាទីទី ៤៥ នាពហុកីឡដ្ឋាន Guadalajara Stadium ដោយ Ugarte បានទាក់ជើងខុសបច្ចេកទេសដោយអចេតនា ពេលព្យាយាមចូលដណ្តើមបាល់ពីខ្សែបម្រើអេស្ប៉ាញ Pedri ពោលគឺបន្តិចមុនពេលកីឡាករ Alex Baena ស៊ុតគ្រាប់បាល់តែមួយគត់ជួយឱ្យក្រុមរបស់លោក Luis de la Fuente យកឈ្នះអ៊ុយរ៉ូហ្គាយ ១-០។ លទ្ធផលនេះបានធ្វើឱ្យក្រុមអ៊ុយរ៉ូហ្គាយ បញ្ចប់ក្នុងចំណាត់ថ្នាក់លេខ ៣ នៅក្នុងពូល H ដោយមានត្រឹមតែ ២ ពិន្ទុប៉ុណ្ណោះ និងត្រូវធ្លាក់ចេញពីយុទ្ធនាការ World Cup 2026 ត្រឹមវគ្គចែកពូលនេះ។
គិតចាប់តាំងពីផ្ទេរពីក្លិប Paris Saint-Germain មកកាន់ទឹកដី Old Trafford ក្នុងតម្លៃខ្លួន ៥០ លានអឺរ៉ូ (បូករួមប្រាក់រង្វាន់បន្ថែម ១០ លានអឺរ៉ូ) ខ្សែបម្រើរូបនេះហាក់ជួបការលំបាកខ្លះៗក្នុងការដណ្តើមកៅអីជម្រើសដំបូង ដោយបានបង្ហាញខ្លួនត្រឹមតែ ៦ ប្រកួតប៉ុណ្ណោះ ក្នុងចំណោម ១៦ ប្រកួតចុងក្រោយនៃក្របខ័ណ្ឌ Premier League រដូវកាល ២០២៥-២៦។ អតីតគ្រូបង្វឹកលោក Ruben Amorim ធ្លាប់បានកត់សម្គាល់ថា កីឡាកររូបនេះត្រូវចំណាយពេលសម្របខ្លួនបន្ថែម ព្រោះលីគកំពូលអង់គ្លេសមានភាពខុសប្លែកគ្នាច្រើនពីលីគនៅបារាំង និងព័រទុយហ្គាល់។
ជាមួយនឹងកិច្ចសន្យាដែលនៅសល់រយៈពេល ៣ ឆ្នាំទៀត របួសចំពេលនេះបានធ្វើឱ្យការប្រជែងតំណែងរបស់ Ugarte ជួបឧបសគ្គបន្តិច។ ស្របពេលជាមួយគ្នានេះ ថ្នាក់ដឹកនាំរបស់ Manchester United ត្រូវបានគេរំពឹងថានឹងបង្កើនសកម្មភាពនៅលើទីផ្សារដោះដូរកីឡាករនារដូវក្តៅនេះ ដើម្បីស្វែងរកខ្សែបម្រើកណ្តាលថ្មីមកពង្រឹងក្រុមបន្ថែម ជាពិសេសបន្ទាប់ពីខ្សែបម្រើចាស់វស្សា Casemiro បានចាកចេញពីក្លិបក្នុងនាមជាកីឡាករគ្មានតម្លៃខ្លួន (Free agent)។
