Luis Suarez ជឿជាក់ថា Julian Alvarez នឹងក្លាយជាអាវុធដ៏មុតស្រួចឥតខ្ចោះសម្រាប់ Barcelona
អត្ថបទសរសេរដោយ Danny • 50 views
ការតាមប្រម៉ាញ់ខ្សែប្រយុទ្ធលំដាប់កំពូលដើម្បីមកជំនួសតំណែងរយៈពេលវែងរបស់ Robert Lewandowski នៅតែក្លាយជាប្រធានបទដ៏ក្តៅគគុកនៅលើទីផ្សារដោះដូរកីឡាករនាដូវក្តៅនេះ ហើយឈ្មោះរបស់ Julian Alvarez នៅតែស្ថិតក្នុងលំដាប់កំពូលនៃបញ្ជីចង់បានរបស់ Barcelona។
ជុំវិញរឿងរ៉ាវដ៏រសើបនេះ វីរៈបុរសខ្សែប្រយុទ្ធរបស់ក្រុមអ្នកមានបុណ្យ កីឡាករ Luis Suarez បានចេញមុខមកផ្តល់បទសម្ភាសន៍ជាមួយសារព័ត៌មាន Mundo Deportivo ដោយបានបង្ហាញការគាំទ្រយ៉ាងពេញទំហឹងចំពោះសមត្ថភាពរបស់ Alvarez ថាជាជម្រើសដ៏សក្តិសមបំផុត ប៉ុន្តែលោកក៏បានទទួលស្គាល់ថា ការអូសទាញតារាឆ្នើមរូបនេះចេញពី Atletico Madrid មិនមែនជារឿងងាយស្រួលឡើយ។
នៅពេលត្រូវសួរដេញដោលអំពីទម្រង់ខ្សែប្រយុទ្ធលេខ ៩ ដែល Barcelona គួរតែស្វែងរក លោក Suarez បានពន្យល់ថា វាអាស្រ័យលើទម្រង់លេងដែលគ្រូបង្វឹកចង់បាន។ លោកជឿជាក់ថា ទម្រង់លេងរបស់លោក Hansi Flick បច្ចុប្បន្ន នៅតែត្រូវការខ្សែប្រយុទ្ធកណ្តាលដែលឈរថេរ (Static number nine) ដូចជា Lewandowski ដើម្បីទប់ទល់ជាមួយខ្សែការពារ និងបើកចន្លោះឱ្យខ្សែប្រយុទ្ធស្លាបទាំងសងខាងដេញបុកចូលតំបន់គ្រោះថ្នាក់។
ទោះជាយ៉ាងណា លោកគ្មានមន្ទិលសង្ស័យទាល់តែសោះចំពោះគុណភាពរបស់ខ្សែប្រយុទ្ធអាហ្សង់ទីន Alvarez ដោយលោកបានបញ្ជាក់ថា៖ «កីឡាករដែលមានការគិតវៃឆ្លាតដូចជា Julian រួមផ្សំនឹងប្រវត្តិរូបដ៏អស្ចារ្យតាំងពីចាកចេញពីក្លិប River Plate ធ្លាប់លេងឱ្យទាំង City, Atletico និងក្រុមជម្រើសជាតិ គឺគាត់នឹងអាចសម្របខ្លួនបានភ្លាមៗ ព្រោះគាត់ដឹងច្បាស់ថាត្រូវបំពេញតួនាទីរបស់ខ្លួនបែបណា។ នៅ Barcelona គាត់នឹងមានខ្សែប្រយុទ្ធស្លាបជាច្រើនដែលចាំបង្កើតឱកាសឱ្យ។ គាត់នឹងអាចចូលរន្ធជាមួយក្រុមបានយ៉ាងរហ័ស»។
ទន្ទឹមនឹងការសរសើរ លោក Suarez ក៏បានទាញយកបទពិសោធន៍ផ្ទាល់ខ្លួនកាលលេងនៅ Liverpool មកធ្វើការប្រៀបធៀបផងដែរថា ការផ្ទេររវាងក្លិបធំៗជារឿយៗតែងតែអាស្រ័យលើពេលវេលា និងការបញ្ចុះបញ្ចូល។ លោកបានរំលឹកថា៖ «កាលពីឆ្នាំ ២០១៣ ខ្ញុំធ្លាប់បង្ខំចិត្តចង់ចាកចេញពី Liverpool ដើម្បីទៅចូលរួមជាមួយ Arsenal។ ពេលនោះប្រធានក្រុម Steven Gerrard បានហៅខ្ញុំទៅនិយាយដាច់ដោយឡែកថា៖ "ស្នាក់នៅទីនេះបន្តទៀតចុះ។ ឆ្នាំក្រោយឯងចង់ទៅណាក៏បាន មិនថជា Barcelona, Real Madrid ឬ Bayern នោះទេ។ ប៉ុន្តែឆ្នាំនេះ សូមអង្វរ កុំទៅ Arsenal អី"។ ហើយគាត់ក៏បានបញ្ចុះបញ្ចូលខ្ញុំជោគជ័យ។ ក្នុងករណីរបស់ Julian នេះក៏ដូចគ្នា គ្រូបង្វឹកលោក Cholo (Diego Simeone) អាចនឹងហៅគេទៅនិយាយដើម្បីសុំឱ្យគេស្នាក់នៅបន្តមួយរដូវកាលទៀតក៏ថាបាន»។
លោកបានសន្និដ្ឋានថា រឿងរ៉ាវទីផ្សារដោះដូររបស់ Alvarez នៅក្នុងសប្តាហ៍ខាងមុខនេះ នឹងក្លាយជាសាច់រឿងមួយដ៏ជក់ចិត្ត និងមានការប្រែប្រួលជាច្រើនដែលអ្នកគាំទ្រមិនអាចរំលងបានឡើយ។
