Kylian Mbappe ស៊ុត ២ គ្រាប់ម្នាក់ឯងបំបែកកំណត់ត្រា Ronaldo ជួយបារាំងឡើងវគ្គ 16 ក្រុម World Cup
អត្ថបទសរសេរដោយ Danny • 73 views
កំពូលខ្សែប្រយុទ្ធរបស់ក្លិប Real Madrid កីឡាករ Kylian Mbappe បានសាងប្រវត្តិសាស្ត្រថ្មីមួយដោយបានវ៉ាដាច់វីរៈបុរសប្រេស៊ីល Ronaldo (R9) នៅក្នុងកំណត់ត្រាពានរង្វាន់ World Cup បន្ទាប់ពីបង្ហាញទម្រង់លេងយ៉ាងលេចធ្លោ ជួយក្រុមមាន់គកបារាំង (France) លត់ស៊ុយអែត (Sweden) ៣-០ ក្នុងវគ្គ ៣២ ក្រុមចុងក្រោយ។
គ្រាប់បាល់បើកឆាករបស់ Mbappe នៅនាទីទី ៤៥ បានក្លាយជាគ្រាប់បាល់ទី ៩ របស់រូបគេនៅក្នុងវគ្គជម្រុះដាច់ខាត (Knockout Stages) នៃពានរង្វាន់ World Cup ដែលជាចំនួនច្រើនបំផុតបំបែកកំណត់ត្រាចាស់របស់វីរៈបុរសប្រេស៊ីលពីររូបគឺ លោក Leonidas និងលោក Ronaldo។
មិនទាន់អស់ចិត្ត នៅវគ្គទីពីរ ក្រោយពេលកីឡាករ Bradley Barcola រកបានគ្រាប់ទីពីរឱ្យបារាំងរួចមក Mbappe បានបន្ថែមគ្រាប់ទីបីនៅនាទីទី ៧៤ ក្រោយទទួលបាល់យ៉ាងស្អាតពីកីឡាករ Michael Olise។ គ្រាប់បាល់នេះ បានធ្វើឱ្យរូបគេមាន ៦ គ្រាប់ក្នុងព្រឹត្តិការណ៍ឆ្នាំ ២០២៦ នេះ ស្មើជាមួយកំពូលខ្សែប្រយុទ្ធអាហ្សង់ទីន Lionel Messi ក្នុងការប្រជែងយកស្បែកជើងមាស (Golden Boot) ហើយបើគិតសរុបគ្រប់អាណត្តិ World Cup វិញ រូបគេរកបាន ១៨ គ្រាប់ ពោលគឺតាមពីក្រោយ Messi តែ ១ គ្រាប់ប៉ុណ្ណោះ (Messi មាន ១៩ គ្រាប់)។
ភ្លាមៗក្រោយរកគ្រាប់បាល់បាន Mbappe បានរត់ទៅឱបសម្តែងការអបអរសាទរជាមួយលោកគ្រូបង្វឹក Didier Deschamps ដែលទើបតែត្រលប់មកដឹកនាំក្រុមវិញ ក្រោយខកខានក្នុងជំនួបចុងក្រោយវគ្គចែកពូល ដើម្បីទៅចូលរួមពិធីបុណ្យសពរបស់ម្តាយលោក។ កាយវិការនេះបានបង្ហាញពីស្មារតីរួបរួមគ្នាយ៉ាងខ្លាំងនៅក្នុងក្រុមបារាំង។
នាពេលបន្ទាប់ ក្រុមជម្រើសជាតិបារាំងត្រូវឡើងទៅតទល់ជាមួយក្រុមប៉ារ៉ាហ្គាយ (Paraguay) ក្នុងវគ្គ ១៦ ក្រុមចុងក្រោយ នៅទីក្រុង Philadelphia នាថ្ងៃទី ៤ ខែកក្កដា ខាងមុខនេះ។
