លោក Jurgen Klopp រិះគន់អាជ្ញាកណ្តាលផង និងឆ្លៀតផ្លែផ្កាឱ្យ Arsenal ផង ក្រោយអាល្លឺម៉ង់ធ្លាក់ចេញពី World Cup
អត្ថបទសរសេរដោយ Danny • 72 views
អតីតអ្នកចាត់ការទូទៅរបស់ Liverpool លោក Jurgen Klopp បានសម្តែងការខឹងសម្បារយ៉ាងខ្លាំងចំពោះការសម្រេចចិត្តរបស់អាជ្ញាកណ្តាល និងបានឆ្លៀតវាយប្រហារលើទម្រង់លេងរបស់ក្លិប Arsenal ក្រោយពេលក្រុមជម្រើសជាតិអាល្លឺម៉ង់ (Germany) ត្រូវធ្លាក់ចេញពីព្រឹត្តិការណ៍ World Cup 2026 វគ្គ ៣២ ក្រុមចុងក្រោយ ក្រោមថ្វីជើងប៉ារ៉ាហ្គាយ (Paraguay)។
នៅក្នុងការប្រកួតដ៏តានតឹងនោះ គ្រាប់បាល់តែតបញ្ចូលទីរបស់ខ្សែការពារ Jonathan Tah នៅក្នុងវគ្គថែមម៉ោង ១៥ នាទីពីរដង ដែលអាចជាគ្រាប់បាល់ជ័យជម្នះរបស់អាល្លឺម៉ង់ ត្រូវបានអាជ្ញាកណ្តាលបដិសេធ (Disallowed) ដោយសារចោទថាមានកំហុសលើអ្នកចាំទី Orlando Gill មុននឹងអាល្លឺម៉ង់ត្រូវចាញ់ក្នុងការទាត់បាល់កាត់សេចក្តីប៉េណាល់ទី។
ឆ្លើយតបនឹងការសម្រេចចិត្តដ៏ចម្រូងចម្រាសនេះ ក្នុងនាមជាអ្នកវិភាគឲ្យទូរទស្សន៍ Magenta TV លោក Klopp បាននិយាយធៀបនឹងក្រុមកាំភ្លើងធំថា៖ «បើគ្រាប់បាល់នេះខុសច្បាប់ នោះ Arsenal ក៏មិនអាចក្លាយជាជើងឯកលីគអង់គ្លេសបានដែរ ព្រោះពួកគេស៊ុតបញ្ចូលទីរហូតដល់ ៦០ ភាគរយតាមរបៀបតែតបុកអ្នកចាំទីបែបហ្នឹង។ ពួកយើងគួរតែឈ្នះការប្រកួតនេះនៅពេលបាល់ចូលទី វាពិតជាសាហាវណាស់»។ ការលើកឡើងនេះ ស្របពេលដែល Arsenal ទើបតែឈ្នះពាន Premier League រដូវកាល ២០២៥-២៦ តាមរយៈការរកគ្រាប់បាល់ពីកូនជ្រុង (Corners) រហូតដល់ទៅ ១៩ គ្រាប់។
ចំណែកឯកីឡាករ Kai Havertz ខ្សែប្រយុទ្ធរបស់ Arsenal ដែលបានទាត់ប៉េណាល់ទីខុសមួយរូបដែរនោះ បានចេញមុខសុំទោសអ្នកគាំទ្រថា៖ «ខ្ញុំគ្មានអ្វីត្រូវនិយាយច្រើនទេ នេះជា World Cup លើកទីពីររបស់ខ្ញុំ ហើយពួកយើងត្រូវធ្លាក់ចេញទាំងមិនទាន់ផុតវគ្គជម្រុះដំបូងពីរដងជាប់គ្នា។ ខ្ញុំសូមខកខាន និងសុំទោសចំពោះរឿងនេះ»។
បច្ចុប្បន្ន ប៉ារ៉ាហ្គាយត្រូវឡើងទៅវគ្គ ១៦ ក្រុមចុងក្រោយនៅទីក្រុង Philadelphia ដោយត្រូវរង់ចាំជួបរវាងបារាំង ឬស៊ុយអែត ខណៈដែលអាល្លឺម៉ង់ត្រូវប្រឈមមុខនឹងការរុះរើក្រុមទាំងស្រុង។
