វីរៈបុរសអង់គ្លេសថា Cristiano Ronaldo អាចបង្កជាគ្រោះថ្នាក់ដល់ព័រទុយហ្គាល់ ខុសពី Lionel Messi ដែលបន្ទាបខ្លួនជួយអាហ្សង់ទីន

វីរៈបុរសបាល់ទាត់អង់គ្លេស លោក John Barnes បានលើកឡើងចំៗថា ឥរិយាបថរបស់កីឡាករ Cristiano Ronaldo អាចនឹងធ្វើឱ្យក្រុមជម្រើសជាតិព័រទុយហ្គាល់ (Portugal) ជួបឧបសគ្គធំក្នុងវគ្គ Knockout នៃពានរង្វាន់ World Cup 2026។ លោកបានប្រៀបធៀបថា ស្ថានភាពរបស់ Ronaldo ពេលនេះប្រៀបដូចជា «គ្រោះថ្នាក់ដែលរង់ចាំថ្ងៃផ្ទុះ» ខុសស្រឡះពី Lionel Messi ដែលមានភាពបន្ទាបខ្លួន និងអាចបង្រួបបង្រួមក្រុមអាហ្សង់ទីនបានយ៉ាងល្អ។

លោក Barnes បានពន្យល់តាមរយៈការសម្ភាសន៍ជាមួយ Betfred ថា ព័រទុយហ្គាល់មានកីឡាករល្អៗជាច្រើនដូចជា Bruno Fernandes ជាដើម ប៉ុន្តែភាពជឿជាក់លើខ្លួនឯងហួសហេតុរបស់ Ronaldo កំពុងបង្កជាសម្ពាធដល់ក្រុម។ លោកបានព្រមានថា បញ្ហានឹងកាន់តែធ្ងន់ធ្ងរ ប្រសិនបើគ្រូបង្វឹកសម្រេចចិត្តដាក់រូបគេឱ្យអង្គុយកៅអីបម្រុងក្នុងជំនួបធំៗ ហើយការដែល Messi កំពុងធ្វើបានល្អ (ស៊ុតបាន ៦ គ្រាប់ក្នុងវគ្គចែកពូល) នឹងកាន់តែធ្វើឱ្យ Ronaldo មួម៉ៅ និងទាមទារខ្លាំងពីមិត្តរួមក្រុមនៅពេលលេងមិនបានល្អ។

ផ្ទុយទៅវិញ លោក Barnes មិនមានការភ្ញាក់ផ្អើលចំពោះទម្រង់លេងដ៏អស្ចារ្យរបស់ Lionel Messi និងបាននិយាយថា៖ «កីឡាករអាហ្សង់ទីនទាំងអស់ស្រឡាញ់ និងលេងដើម្បី Messi ព្រោះរូបគេមានភាពបន្ទាបខ្លួន និងគោរពមិត្តរួមក្រុម ទោះបីជារូបគេមិនសូវរត់ច្រើនក៏គ្មានអ្នកអន់ចិត្តដែរ។ ប៉ុន្តែនៅព័រទុយហ្គាល់វាខុសគ្នា ខ្ញុំគិតថាកីឡាករដទៃមិនសូវសប្បាយចិត្តនឹង Ronaldo ឡើយ ចំពោះកាយវិការមិនពេញចិត្តរបស់គេនៅពេលមិនបានបាល់»។

បច្ចុប្បន្ន ព័រទុយហ្គាល់ត្រូវត្រៀមខ្លួនប្រឈមមុខនឹងក្រុមក្រូអាត (Croatia) ក្នុងវគ្គ ៣២ ក្រុមចុងក្រោយ ខណៈដែលអាហ្សង់ទីនដែលកំពុងមានស្មារតីខ្ពស់ត្រូវតទាល់ជាមួយក្រុមខេបវើដ (Cape Verde)។