Zlatan Ibrahimovic ចេញមុខមកចំអកឱ្យ Cristiano Ronaldo រឿងស្រែកដាក់កាមេរ៉ាថា «ខ្ញុំត្រឡប់មកវិញហើយ» ក្រោយស៊ុតចូលក្រុមខ្សោយ
អត្ថបទសរសេរដោយ Danny • 38 views
វីរៈបុរសបាល់ទាត់ស៊ុយអែត លោក Zlatan Ibrahimovic បានចេញមុខមកនិយាយឌឺដងដាក់កំពូលតារាឆ្នើម Cristiano Ronaldo បន្ទាប់ពីខ្សែប្រយុទ្ធវ័យ ៤១ ឆ្នាំរូបនេះ បានស្រែកខ្លាំងៗដាក់កាមេរ៉ាថា «ខ្ញុំត្រឡប់មកវិញហើយ (I am back)» ពេលរកបាន ២ គ្រាប់ម្នាក់ឯង ជួយឱ្យព័រទុយហ្គាល់លត់អ៊ូសបេគីស្ថាន (Uzbekistan) ៥-០ ក្នុងព្រឹត្តិការណ៍ World Cup 2026។
បន្ទាប់ពីលេងមិនសូវដាច់នៅក្នុងការប្រកួតបើកឆាកដែលស្មើជាមួយកុងហ្គោ (DR Congo) ១-១ មក Ronaldo បានរំដោះសម្ពាធដោយការស៊ុត ២ គ្រាប់យ៉ាងស្អាត ពីការបញ្ជូនរបស់ Joao Cancelo និង Bruno Fernandes។ យ៉ាងណាមិញ លោក Ibrahimovic ដែលកំពុងធ្វើជាអ្នកវិភាគឱ្យទូរទស្សន៍ Fox Sports ហាក់មិនសូវជ្រកកោននឹងកាយវិការអបអរសាទរនេះឡើយ ដោយលោកបាននិយាយបែបចំអកថា៖ «វាជាការប្រកួតដែលត្រូវតែស៊ុតចូលហើយ ព្រោះព័រទុយហ្គាល់ត្រូវរកគ្រាប់បាល់ឱ្យបានច្រើន។ ចំណែកសាររបស់គាត់វិញ ខ្ញុំគិតថាគាត់មិនដែលចាកចេញទៅណាផងហ្នឹង ចុះហេតុអ្វីបានជាត្រូវនិយាយថា ខ្ញុំត្រឡប់មកវិញ?»។
ទោះបីជាមានការរិះគន់ពី Zlatan ក៏ដោយ ក៏គ្រាប់បាល់ទាំងនេះបានធ្វើឱ្យ Cristiano Ronaldo បង្កើតប្រវត្តិសាស្ត្រដ៏អស្ចារ្យ ដោយក្លាយជាកីឡាករតែម្នាក់គត់នៅលើពិភពលោក ដែលអាចស៊ុតបញ្ចូលទីបានក្នុងការប្រកួត World Cup ដល់ទៅ ៦ ជំនាន់ផ្សេងគ្នា (ចាប់តាំងពីឆ្នាំ ២០០៦ មក)។ បើទោះបីជាគូប្រជែង Lionel Messi បានចូលរួម ៦ ព្រឹត្តិការណ៍ដូចគ្នាក៏ដោយ ប៉ុន្តែ Messi ខកខានមិនបានរកគ្រាប់បាល់ឡើយកាលពីឆ្នាំ ២០១០។
បច្ចុប្បន្ន ព័រទុយហ្គាល់កំពុងមានឱកាសខ្ពស់ក្នុងការឡើងទៅវគ្គបន្ត និងមានគោលដៅដណ្តើមតំណែងកំពូលតារាងក្នុងពូល K មុនពេលត្រូវតទល់ជាមួយកូឡុំប៊ី (Colombia) នាទីក្រុងម៉ៃអាមី សម្រាប់ការប្រកួតចុងក្រោយ។
