សមាគមកម្មករ គំរាមធ្វើកូដកម្ម បង្កភាពច្របូកច្របល់ដល់ការរៀបចំព្រឹត្តិការណ៍ World Cup 2026 នៅ Los Angeles

ការរៀបចំ World Cup 2026 កំពុងស្ថិតក្នុងស្ថានភាពតានតឹងខ្លាំង បន្ទាប់ពីសហជីពតំណាងកម្មករប្រហែល 2,000 នាក់ នៅ SoFi Stadium ក្នុង United States បានគំរាមធ្វើកូដកម្ម ដែលអាចរំខានដល់ការរៀបចំការប្រកួតនៅ Los Angeles។

អង្គការតំណាងកម្មករ Unite Here Local 11 បានអំពាវនាវទៅកាន់ FIFA ឲ្យដក អាជ្ញាធរអន្តោប្រវេសន៍ និងគយ ចេញពីតួនាទីណាមួយដែលពាក់ព័ន្ធនឹងការរៀបចំការប្រកួត World Cup នៅ Los Angeles ហើយបានព្រមានថា ប្រសិនបើមិនគោរពតាម អាចនឹងមានសកម្មភាពតវ៉ាខ្លាំងជាងនេះ។

អង្គការតំណាងកម្មករនេះ តំណាងឲ្យមុខរបរដូចជា ចុងភៅ និងបុគ្គលិកបារ នៅ SoFi Stadium បានបញ្ជាក់ថា សមាជិករបស់ពួកគេនៅតែធ្វើការដោយគ្មានកិច្ចសន្យាផ្លូវការ ទោះបីជាព្រឹត្តិការណ៍ជិតចាប់ផ្តើមក៏ដោយ ដែលបង្កការព្រួយបារម្ភអំពីសិទ្ធិ និងលក្ខខណ្ឌការងារ។

សហជីពបានដាក់សំណើចម្បង 3 ចំណុចទៅកាន់ FIFA និងក្រុមហ៊ុន Kroenke Sports & Entertainment៖

• ធានាថា អាជ្ញាធរអន្តោប្រវេសន៍ និងគយ និងកងការពារព្រំដែន នឹងមិនចូលរួមក្នុងព្រឹត្តិការណ៍នេះ
• ការពារការងាររបស់កម្មករ និងកែលម្អបរិយាកាសការងារ
• គាំទ្រការផ្តល់លំនៅដ្ឋានមានតម្លៃសមរម្យសម្រាប់កម្មករ

ការតវ៉ានេះកើតឡើងបន្ទាប់ពីប្រធានបណ្តោះអាសន្ននៃ អាជ្ញាធរអន្តោប្រវេសន៍ និងគយ លោក Todd Lyons បាននិយាយថា អង្គភាពនេះនឹងមាន “តួនាទីសំខាន់” ក្នុងព្រឹត្តិការណ៍ World Cup ដែលធ្វើឲ្យអង្គការតំណាងកម្មករព្រួយបារម្ភអំពីសុវត្ថិភាពរបស់កម្មករ និងអ្នកគាំទ្រ។

ដល់ពេលនេះ FIFA មិនទាន់មានការឆ្លើយតបផ្លូវការឡើយ ខណៈអ្នកគ្រប់គ្រង SoFi Stadium ក៏នៅស្ងៀមមិនបានបញ្ចេញមតិយោបល់។

សមាគមកម្មករ ក៏បានបន្ថែមថា ពួកគេចង់ឲ្យមានការធានាថា មិនប្រើបច្ចេកវិទ្យា AI (Artificial Intelligence) ប្រសិនបើវាអាចបណ្ដាលឲ្យបាត់បង់ការងារ។

ក្រៅពីបញ្ហាការងារ អង្គការតំណាងកម្មករក៏បានលើកឡើងពីបញ្ហាផ្ទះសម្បែងនៅ Los Angeles ជាពិសេសតំបន់ Inglewood ដោយអំពាវនាវឲ្យមានគោលនយោបាយគាំទ្រកម្មករ និងគ្រួសារជនអន្តោប្រវេសន៍។

លោក Kurt Petersen មេដឹកនាំសមាគមកម្មករបាននិយាយថា៖

“FIFA និងអ្នកឧបត្ថម្ភនឹងរកចំណូលរាប់ពាន់លានដុល្លារ ប៉ុន្តែតួនាទីសំខាន់របស់កម្មករដែលជាគ្រឹះនៃភាពជោគជ័យ ត្រូវបានមើលរំលង។”

Los Angeles គ្រោងនឹងធ្វើជាម្ចាស់ផ្ទះការប្រកួត World Cup ចំនួន 8 ប្រកួត នៅ SoFi Stadium ចាប់ពីថ្ងៃទី 12 ខែមិថុនា ដោយមានការប្រកួតរវាង United States និង Paraguay ប៉ុន្តែស្ថានភាពតានតឹងនេះ អាចប៉ះពាល់ដល់បរិយាកាសទាំងមូលនៃព្រឹត្តិការណ៍។