PSG បង្វែរគោលដៅមកទិញ Ferran Torres ពី Barcelona បន្ទាប់ពីចាញ់ Real Madrid ក្នុងការប្រជែងយក Yan Diomande

ក្លិប Paris Saint-Germain បានបង្កើនសកម្មភាពក្នុងការទាក់ទងទិញយកខ្សែប្រយុទ្ធ Ferran Torres របស់ Barcelona ដើម្បីប៉ះប៉ូវការខកខានមិនបាន Yan Diomande ដែលបានសម្រេចចិត្តផ្ទេរទៅ Real Madrid នៅនាទីចុងក្រោយ។ ក្លិបអ្នកមានបារាំងមួយនេះ មានទំនុកចិត្តយ៉ាងខ្លាំងក្នុងការសម្រេចកិច្ចព្រមព្រៀង ដោយផ្អែកលើបំណងប្រាថ្នារបស់កីឡាករដែលចង់ស្វែងរកការប្រកួតប្រជែងថ្មី។

យោងតាមសារព័ត៌មានកាតាឡាន Sport បានឱ្យដឹងថា PSG ចាត់ទុក Torres និងខ្សែប្រយុទ្ធស្លាប Akliouche របស់ Monaco ជាគោលដៅចម្បងពីររូបដើម្បីពង្រឹងតំបន់ប្រយុទ្ធ មុនពេលទីផ្សារដោះដូរកីឡាករបិទទ្វារ។ ការស្វែងរកកីឡាករថ្មីនេះបានក្លាយជារឿងបន្ទាន់ ខណៈដែល Kolo Muani ត្រូវបានគេរំពឹងថានឹងផ្លាស់ទៅ Juventus ហើយ Barcola កំពុងឆ្ពោះទៅកាន់ Liverpool។ ដើមឡើយ Diomande គឺជាគោលដៅកំពូលរបស់ PSG ប៉ុន្តែ Real Madrid បានលាតដៃចូល និងហ៊ានចំណាយប្រាក់រហូតដល់ 120 លានអឺរ៉ូ ខណៈដែល PSG ស្ទាក់ស្ទើរជាមួយនឹងតម្លៃខ្លួនជាង 100 លានអឺរ៉ូដែល Leipzig ទាមទារ។

ការលក់ Goncalo Ramos ទៅឱ្យ Milan និងកិច្ចព្រមព្រៀងលក់ Kolo Muani ទៅឱ្យ Juventus ក្នុងតម្លៃ 40 លានអឺរ៉ូ គឺជាសោរដ៏សំខាន់ដែលផ្តល់ថវិកាឱ្យ PSG យកទៅទិញ Torres។ គ្រូបង្វឹកលោក Luis Enrique ចង់បានរូបគេយ៉ាងខ្លាំងមកដើរតួជាខ្សែប្រយុទ្ធកណ្តាល ខណៈដែល Torres វ័យ 26 ឆ្នាំរូបនេះ ក៏បើកផ្លូវក្នុងការចាកចេញពី Barcelona ផងដែរ ដោយសារកិច្ចសន្យារបស់គេនៅសល់តែ ១ ឆ្នាំទៀតប៉ុណ្ណោះ។ PSG កំពុងរៀបចំកិច្ចសន្យារយៈពេល ៤ ឆ្នាំ ជាមួយនឹងប្រាក់ពលកម្មខ្ពស់ជាងអ្វីដែលគេទទួលបាននៅ Barcelona ហើយទំនាក់ទំនងជិតស្និទ្ធរវាងលោក Luis Enrique និង Torres ក៏ជាកត្តាសំខាន់ក្នុងការទាក់ទាញកីឡាករូបនេះផងដែរ។