Wayne Rooney គាំទ្រ Declan Rice ឱ្យក្លាយជាប្រធានក្រុមជម្រើសជាតិអង់គ្លេសបន្ទាប់ពី Harry Kane

វីរបុរសបាល់ទាត់អង់គ្លេសលោក Wayne Rooney បានលើកសរសើរយ៉ាងខ្លាំងដល់ខ្សែបម្រើ Declan Rice របស់ក្លិប Arsenal ដោយចាត់ទុកថាគេគឺជាកីឡាករដែល "មិនអាចជំនួសបាន" និងជាបេក្ខភាពស័ក្តិសមបំផុតក្នុងការទទួលតំណែងប្រធានក្រុមតោខៀវទាំងបី បន្ទាប់ពី Harry Kane ចូលនិវត្តន៍។ Rooney មានការចាប់អារម្មណ៍យ៉ាងខ្លាំងចំពោះទម្រង់លេងរបស់ Rice ក្នុងជំនួបឈ្នះ Everton ១-០ ដោយលោកលើកឡើងថា Rice មានភាពវៃឆ្លាតក្នុងការសម្រេចចិត្ត បច្ចេកទេសបញ្ជូនបាល់ច្បាស់លាស់ និងអាចបំពេញតួនាទីបានគ្រប់កន្លែង ចាប់ពីតំបន់ការពាររហូតដល់តំបន់ប្រយុទ្ធ។ ក្រៅពីសមត្ថភាព លោក Rooney យល់ថា Rice មានអត្តចរិតដឹកនាំ និងការតាំងចិត្តខ្ពស់ដែលគ្រប់គ្នាស្រឡាញ់ចូលចិត្ត ដែលធ្វើឱ្យគេក្លាយជាអ្នកបន្តវេនពី Harry Kane នាពេលអនាគត។

Harry Kane: បច្ចុប្បន្ននៅតែជាប្រធានក្រុម និងជាបង្គោលគ្រឹះសម្រាប់ World Cup 2026។ គេកំពុងស្ថិតក្នុងគន្លងនៃការបំបែកកំណត់ត្រាបង្ហាញខ្លួនច្រើនបំផុត (១២៥ ប្រកួតរបស់ Peter Shilton) ខណៈដែលបច្ចុប្បន្នគេជាអ្នកស៊ុតបញ្ចូលទីច្រើនជាងគេឱ្យអង់គ្លេស (៧៨ គ្រាប់)។

លោក Rooney ក៏បានបញ្ចេញមតិការពារខ្សែប្រយុទ្ធ Gyokeres របស់ Arsenal ផងដែរ៖

• តួនាទីក្នុងក្រុម: ទោះបីជាមិនសូវស៊ុតបញ្ចូលទីបានច្រើនដូចកាលនៅព័រទុយហ្គាល់ ប៉ុន្តែ Gyokeres បានធ្វើការងារយ៉ាងសំខាន់ក្នុងការទាញខ្សែការពារគូប្រកួតឱ្យដាច់ពីគ្នា ដែលជួយបង្កើតលំហ (Space) ឱ្យមិត្តរួមក្រុមផ្សេងទៀតលេងបានស្រួល។

• ការទាត់បាល់ពិន័យ (Penalty): Rooney គាំទ្រឱ្យ Gyokeres ជាអ្នកទាត់ប៉េណាល់ទីដើម្បីបង្កើនទំនុកចិត្ត ក្នុងនាមជាខ្សែប្រយុទ្ធលេខ ៩ របស់ក្រុម។