Toni Kroos ចេញការពារ Cristiano Ronaldoនិងបាននិយាយថា “បើគ្មានគាត់ គ្មានអ្នកណាមើល Saudi Pro League ទេ”
អត្ថបទសរសេរដោយ Dany • 79 views
វីរបុរស អតីតខ្សែបម្រើ Real Madrid គឺ Toni Kroos បានចេញមុខការពារ Cristiano Ronaldo ជុំវិញរឿង កូដកម្មមិនចូលលេង នៅ Al-Nassr ដោយបញ្ជាក់យ៉ាងច្បាស់ថា Saudi Pro League នឹងមិនមានការចាប់អារម្មណ៍ដូចសព្វថ្ងៃនេះទេ ប្រសិនបើគ្មានតារាព័រទុយហ្គាល់រូបនេះ។
ក្នុងបទសម្ភាសន៍ថ្មីៗ Toni Kroos បាននិយាយថា៖
“បើគ្មាន Cristiano Ronaldo ខ្ញុំមិនជឿថាមានមនុស្សច្រើនបែបនេះមើល Saudi Pro League ទេ។ គាត់គឺជាមុខមាត់ដ៏ធំបំផុតរបស់លីគនេះ។”
ការលើកឡើងនេះកើតឡើងបន្ទាប់ពី Cristiano Ronaldo បានធ្វើ កូដកម្ម មិនចូលលេងពីរប្រកួតសម្រាប់ Al-Nassr ដើម្បីបង្ហាញការមិនពេញចិត្តចំពោះការវិនិយោគរបស់ Saudi Public Investment Fund (PIF) ដែលគាត់យល់ថាផ្តល់អត្ថប្រយោជន៍ខ្លាំងជាងទៅឱ្យក្លិបដទៃ។
ទោះជាយ៉ាងណា បច្ចុប្បន្នមានសញ្ញាថា Cristiano Ronaldo នឹងវិលត្រឡប់មកលេងវិញឆាប់ៗនេះ។ គាត់បានត្រឡប់ទៅហ្វឹកហាត់ជាមួយ Al-Nassr ក្រោមការដឹកនាំរបស់គ្រូបង្វឹក Jorge Jesus ហើយត្រូវបានរំពឹងថានឹងចូលលេងក្នុងការប្រកួតបន្ទាប់។
Toni Kroos ក៏បានបន្ថែមថា ការមកដល់របស់ Cristiano Ronaldo នៅអារ៉ាប៊ីសាអូឌីតមិនត្រឹមតែបង្កើនគុណភាពលីគទេ ប៉ុន្តែថែមទាំងនាំអ្នកគាំទ្រពីទូទាំងពិភពលោកឱ្យចាប់អារម្មណ៍លើ Saudi Pro League ផងដែរ។
អ្នកវិភាគជាច្រើនយល់ស្របថា បើគ្មាន Cristiano Ronaldo, លីគនេះប្រហែលមិនទទួលបានការផ្សព្វផ្សាយ និងការចាប់អារម្មណ៍ខ្លាំងដូចពេលនេះឡើយ។
