Steven Gerrard បញ្ចេញមតិជុំវិញពាក្យចចាមអារ៉ាមដេញលោក Arne Slot និងការត្រលប់ទៅ Liverpool
អត្ថបទសរសេរដោយ Bonat • 92 views
វីរបុរសក្លិប Liverpool លោក Steven Gerrard បានផ្ដល់បទសម្ភាសន៍យ៉ាងច្បាស់លាស់ជុំវិញអនាគតរបស់គ្រូបង្វឹកលោក Arne Slot និងជំហរផ្ទាល់ខ្លួនរបស់លោក ចំពោះការវិលត្រលប់ទៅកាន់ទឹកដី Anfield វិញ។ Gerrard បានបញ្ជាក់យ៉ាងច្បាស់ថា លោក មិនចង់ឃើញ Arne Slot បាត់បង់ការងារឡើយ។ លោកចង់ឱ្យគ្រូបង្វឹកសញ្ជាតិហូឡង់រូបនេះ បន្តដឹកនាំដើម្បីកែប្រែស្ថានការណ៍ និងធ្វើឱ្យ Liverpool ខ្លាំងខ្លាឡើងវិញ ដូចកាលដែលពួកគេបានឈ្នះពានរង្វាន់ Premier League កាលពីរដូវកាលមុន។ Gerrard យល់ថា ស្ថេរភាពក្នុងក្លិបគឺជារឿងសំខាន់បំផុតនាពេលនេះ ដើម្បីឱ្យក្រុមអាចរក្សាទម្រង់លេងល្អឡើងវិញ។ នៅពេលសួរថា តើលោកចង់ត្រលប់មកធ្វើការនៅ Liverpool ដែរឬទេ? Gerrard បានឆ្លើយដោយស្មោះត្រង់ថា៖ "ខ្ញុំនឹងជួយ Liverpool គ្រប់ផ្នែកទាំងអស់ មិនថាពេលណាឡើយ"។ លោកសង្កត់ធ្ងន់ថា អ្វីដែលលោកចង់បានបំផុតគឺភាពជោគជ័យរបស់ក្លិប ក្នុងនាមជាអ្នកគាំទ្រម្នាក់។ ការត្រលប់មកវិញរបស់លោកនឹងកើតឡើង លុះត្រាតែក្លិបត្រូវការលោកពិតប្រាកដ មិនមែនដោយសារមហិច្ឆតាផ្ទាល់ខ្លួនដើម្បីដណ្តើមតំណែងអ្នកណានោះទេ។
បន្ទាប់ពីឈ្នះជើងឯកឆ្នាំ ២០២៤-២៥ រដូវកាលទី ២ របស់ Slot ហាក់មានភាពរអាក់រអួល ដែលធ្វើឱ្យមានសម្ពាធខ្លាំងពីអ្នកគាំទ្រ។ ការយកឈ្នះ Tottenham ២-១ កាលពីពេលថ្មីៗនេះ បានជួយឱ្យ Liverpool ហក់ឡើងមកឈរ លេខ ៥ និងកាត់បន្ថយសម្ពាធលើលោក Slot បានមួយកម្រិត ខណៈដែលក្រុមបន្តស្វែងរកកៅអី Champions League។ Steven Gerrard ចង់ឱ្យអ្នកគាំទ្រមានការអត់ធ្មត់ជាមួយ Arne Slot ប៉ុន្តែក៏បានបើកទ្វារចំហរសម្រាប់ក្លិបជានិច្ច ប្រសិនបើពួកគេត្រូវការជំនួយពីលោកនាពេលអនាគត។
