Spurs ប្រឈមធ្លាក់ទៅ Premier League ខណៈ Son Heung-min កំពុងលេចធ្លោនៅ MLS
អត្ថបទសរសេរដោយ Dany • 60 views
រដូវកាល ២០២៥-២៦ ក្លាយជារដូវកាលដ៏អាក្រក់បំផុតមួយសម្រាប់ Tottenham Hotspur ខណៈពួកគេមិនស្គាល់ពាក្យថាឈ្នះក្នុង ១៤ប្រកួតចុងក្រោយនៅ Premier League ហើយកំពុងធ្លាក់ទៅតំបន់ត្រូវកាត់ចោល។ ការបរាជ័យ ១-០ ទល់នឹង Sunderland គឺជាការចាញ់លើកទី៩ក្នុងចំណោមលទ្ធផលអន់ៗទាំងនោះ ដែលធ្វើឲ្យស្ថានភាពកាន់តែធ្ងន់ធ្ងរ។
ក្រោមការដឹកនាំរបស់គ្រូបង្វឹកថ្មី Roberto De Zerbi, ក្រុមមិនទាន់អាចរកឃើញចំណុចបង្វិលស្ថានការណ៍ឡើងវិញបានឡើយ។ ១៤ប្រកួតចុងក្រោយ ពួកគេទទួលបានត្រឹមតែ ៥ពិន្ទុប៉ុណ្ណោះ ដែលបានរុញឲ្យក្លិបធ្លាក់ទៅលេខ ១៩ ក្នុងតារាង។ បន្ទាប់ពីលេង ៣២ប្រកួត Spurs មាន ៣០ពិន្ទុ តាមពីក្រោយ West Ham United នៅតំបន់សុវត្ថិភាព ២ពិន្ទុប៉ុណ្ណោះ ខណៈពេលនៅសល់តែ ៦ប្រកួតទៀតសម្រាប់សង្គ្រោះរដូវកាល។
ការធ្លាក់ចុះនេះកើតឡើងបន្ទាប់ពីរដូវកាលមុនដែលពួកគេបានឡើងទៅលេង UEFA Champions League ប៉ុន្តែការបាត់បង់តារាសំខាន់ Son Heung-min នៅដើមរដូវកាល បានប៉ះពាល់យ៉ាងខ្លាំងដល់កម្លាំងប្រយុទ្ធរបស់ក្រុម។
ផ្ទុយទៅវិញ Son Heung-min កំពុងបង្ហាញទម្រង់លេងគួរឱ្យចាប់អារម្មណ៍នៅ Los Angeles FC ក្នុងលីគ MLS។ ក្រោយចូលរួមជាមួយក្លិបអាម៉េរិក ខ្សែប្រយុទ្ធជនជាតិកូរ៉េខាងត្បូងរូបនេះបានជួយក្រុមឲ្យមានការប្រកួតប្រជែងខ្លាំង ដោយក្នុង ៧ប្រកួត ក្រុមរកបាន ១៦ពិន្ទុ និងឈរលេខ៣បណ្តោះអាសន្ន តាមពីក្រោយក្រុមកំពូលតារាងត្រឹមតែ ២ពិន្ទុប៉ុណ្ណោះ។
ទោះមិនទាន់រកគ្រាប់បាល់បានក៏ដោយ Son Heung-min បានបង្ហាញឥទ្ធិពលរបស់ខ្លួនតាមរយៈការបញ្ជូនបាល់ឱ្យមិត្តរួមក្រុមសម្រេចទីដល់ទៅ ៦លើក បញ្ជាក់ថាគេនៅតែជាកីឡាករសំខាន់មួយនៅលើទីលាន។
ស្ថានភាពផ្ទុយគ្នារវាង Tottenham Hotspur និង Son Heung-min បង្ហាញយ៉ាងច្បាស់ថា ការបាត់បង់តារាឆ្នើមអាចមានឥទ្ធិពលធំលើលទ្ធផលក្រុម ខណៈ Spurs កំពុងប្រឈមនឹងការធ្លាក់ទៅលីគទី២ ប្រសិនបើមិនអាចកែប្រែទម្រង់លេងបានទាន់ពេលវេលា។
