លោក Roman Abramovich រៀបចំក្រុមមេធាវីខ្លាំងៗដើម្បីតតាំងក្នុងរឿងក្ដីនៅកោះ Jersey និងបដិសេធសំណើរបស់នាយករដ្ឋមន្ត្រីអង់គ្លេស

អតីតម្ចាស់ក្លិប Chelsea លោក Roman Abramovich បានបង្កើតក្រុមមេធាវីលំដាប់ពិភពលោក ដើម្បីតតាំងក្ដីនៅតុលាការកោះ Jersey ដែលជាមូលហេតុធ្វើឱ្យប្រាក់រាប់ពាន់លានផោនពីការលក់ក្លិប Chelsea សម្រាប់ជួយជនរងគ្រោះក្នុងសង្គ្រាមអ៊ុយក្រែន នៅតែត្រូវបានបង្កកមិនអាចបញ្ចេញបាន។

លោក Abramovich បានប្រមូលផ្តុំអ្នកច្បាប់លំដាប់ខ្ពស់រួមមាន៖

• Eric Herschmann: អតីតទីប្រឹក្សាសេតវិមានរបស់លោក Donald Trump។

• Lord Wolfson KC: មេធាវីជាន់ខ្ពស់ និងជាសមាជិកសភាអង់គ្លេស។

• រួមជាមួយអតីតមន្ត្រីច្បាប់ជាន់ខ្ពស់នៃកោះ Jersey និងអ្នកជំនាញសិទ្ធិមនុស្សជាច្រើនរូបទៀត។

នាយករដ្ឋមន្ត្រីអង់គ្លេសបានជំរុញឱ្យលោក Abramovich "បង់ប្រាក់ឥឡូវនេះ" ដើម្បីយកទៅប្រើប្រាស់ក្នុងកិច្ចការមនុស្សធម៌នៅអ៊ុយក្រែន។ ក្រុមមេធាវីរបស់លោកបានច្រានចោលសំណើនេះ ដោយអះអាងថា ដរាបណារឿងក្ដីនៅកោះ Jersey មិនទាន់ដោះស្រាយចប់ ការពិភាក្សាអំពីការបញ្ចេញប្រាក់ ២,៣៥ ពាន់លានផោន មិនអាចធ្វើទៅបានឡើយ។ លោក Abramovich បានឈ្នះក្ដីក្នុងដំណាក់កាលដំបូង បន្ទាប់ពីតុលាការរកឃើញថា អាជ្ញាធរកោះ Jersey បានរំលោភលើការការពារទិន្នន័យផ្ទាល់ខ្លួនរបស់លោក (មានការលុបសារ និងអ៊ីមែលពាក់ព័ន្ធនឹងរូបលោក)។ កោះ Jersey បានបង្កកទ្រព្យសម្បត្តិដែលពាក់ព័ន្ធនឹងរូបលោកក្នុងតម្លៃប្រហែល ៥,៣ ពាន់លានផោន។ មានការជាប់ជំពាក់បំណុលចំនួន ១,៥ ពាន់លានផោន រវាងក្រុមហ៊ុនលក់ Chelsea និងក្រុមហ៊ុនមេនៅកោះ Jersey ដែលធ្វើឱ្យរចនាសម្ព័ន្ធហិរញ្ញវត្ថុមានភាពស្មុគស្មាញ និងមិនអាចដោះស្រាយបាន ប្រសិនបើបម្រាមបង្កកទ្រព្យសម្បត្តិនៅកោះ Jersey នៅតែបន្ត។

ប្រតិកម្មពីភាគីពាក់ព័ន្ធ

• ភាគី Abramovich: ចោទប្រកាន់ថា ការស៊ើបអង្កេតរបស់អាជ្ញាធរ Jersey ធ្វើឡើងក្រោមហេតុផលនយោបាយ ដើម្បីកែប្រែកេរ្តិ៍ឈ្មោះមជ្ឈមណ្ឌលហិរញ្ញវត្ថុរបស់ខ្លួន ក្រោយផ្ទុះសង្គ្រាមរុស្ស៊ី-អ៊ុយក្រែន។

• រដ្ឋាភិបាលកោះ Jersey: បដិសេធរាល់ការចោទប្រកាន់ពីការឃុបឃិត ឬអំពើខុសច្បាប់ និងអះអាងថានឹងការពារជំហររបស់ខ្លួននៅតុលាការដល់ទីបញ្ចប់។