Real Madrid កំណត់ Vitinha ជាគោលដៅសំខាន់ ដើម្បីជំនួស Kroos និង Modrić

សារព័ត៌មានអេស្ប៉ាញ Marca បានរាយការណ៍ថា ក្លិបយក្ស Real Madrid កំពុងស្វែងរកខ្សែបម្រើថ្មី ដើម្បីមកជំនួសតំណែងរបស់ Toni Kroos និង Luka Modrić ដែលបានចាកចេញទៅរួចហើយ។ ការចាកចេញរបស់វីរបុរសទាំងពីរនេះ បានធ្វើឱ្យតំបន់កណ្ដាលរបស់ “អធិរាជស” បាត់បង់ទាំងបទពិសោធន៍ និងគុណភាពយ៉ាងច្បាស់។

យោងតាមរបាយការណ៍ដដែល Real Madrid បានកំណត់ឈ្មោះ Vitinha ខ្សែបម្រើអន្តរជាតិព័រទុយហ្គាល់របស់ Paris Saint-Germain (PSG) ជាគោលដៅសំខាន់មួយ សម្រាប់ទីផ្សារផ្ទេរកីឡាកររដូវក្តៅឆ្នាំក្រោយ។ កីឡាករវ័យក្មេងរូបនេះ កំពុងបង្ហាញទម្រង់លេងលេចធ្លោទាំងការគ្រប់គ្រងបាល់ និងការបញ្ជូន ដែលសមស្របនឹងរចនាបថបាល់ទាត់របស់ Real Madrid ចង់បាន។

ទោះជាយ៉ាងណា ការផ្ទេរនេះមិនមែនជារឿងងាយស្រួលឡើយ ព្រោះ PSG បានកំណត់តម្លៃខ្លួនរបស់ Vitinha ដល់ទៅ 90 លានអឺរ៉ូ ដែលជាតម្លៃខ្ពស់ និងអាចក្លាយជាឧបសគ្គសម្រាប់ក្លិបណាមួយដែលចង់ទទួលបានសេវាកម្មរបស់គេ។

Real Madrid ត្រូវបានគេរំពឹងថា នឹងធ្វើការវាយតម្លៃយ៉ាងម៉ត់ចត់ មុនពេលធ្វើសេចក្តីសម្រេចចុងក្រោយ ដើម្បីធានាថា កីឡាករថ្មីអាចបំពេញតួនាទីសំខាន់នៅតំបន់កណ្ដាល និងជួយក្លិបបន្តរក្សាភាពខ្លាំងនៅលើឆាកអឺរ៉ុបបាន។