អតីតតារា Real Madrid លោក Sergio Ramos ផ្តល់ព័ត៌មានថ្មីអំពីការទិញក្លិប Sevilla
អត្ថបទសរសេរដោយ Dany • 52 views
អតីតតារាបាល់ទាត់របស់ Real Madrid និងជម្រើសជាតិអេស្ប៉ាញ Sergio Ramos បានបង្ហាញព័ត៌មានថ្មីសំខាន់មួយពាក់ព័ន្ធនឹងគម្រោងដឹកនាំការទិញក្លិបដែលគាត់ធ្លាប់លេងតាំងពីកុមារភាព គឺ Sevilla។
តាមរបាយការណ៍ Ramos កំពុងដឹកនាំក្រុមវិនិយោគមួយ ដែលមានការគាំទ្រពីក្រុមហ៊ុន Five Eleven Capital ដើម្បីក្លាយជាម្ចាស់ភាគហ៊ុនធំក្នុងក្លិប។ កីឡាករវ័យ 40 ឆ្នាំរូបនេះ ដែលបច្ចុប្បន្នកំពុងមិនមានក្លិបលេង បន្ទាប់ពីចាកចេញពី Rayados de Monterrey នៅចុងឆ្នាំ 2025 ហើយបានធ្វើឲ្យដំណើរការនេះមានការរីកចម្រើនយ៉ាងខ្លាំង។
អ្នកគាំទ្រ Sevilla ក៏កំពុងមានក្តីរំពឹងខ្ពស់ចំពោះការត្រឡប់មកវិញរបស់តារាក្នុងស្រុករូបនេះ ប៉ុន្តែក្នុងតួនាទីជាអ្នកគ្រប់គ្រង មិនមែនជាកីឡាករ។ ក្លិបកំពុងជួបបញ្ហាលទ្ធផលក្នុង La Liga ហើយជិតតំបន់ធ្លាក់ចុះក្នុងរដូវកាលចុងៗក្រោយនេះ។
ក្នុងព្រឹត្តិការណ៍មួយនៅទីក្រុង Seville លោក Ramos បានបញ្ជាក់ថា ការចរចាអាចនឹងមានលទ្ធផលក្នុងពេលឆាប់ៗនេះ។
គាត់បាននិយាយថា៖
“ខ្ញុំគិតថានឹងមានដំណឹងមួយក្នុងប៉ុន្មានខែ ឬសូម្បីតែប៉ុន្មានសប្ដាហ៍ខាងមុខ ហើយយើងសង្ឃឹមថាវានឹងជាដំណឹងល្អដែលគ្រប់គ្នាចង់បាន។ អ្វីៗកំពុងដំណើរការល្អ”។
យ៉ាងណាក៏ដោយ ប្រសិនបើការទិញនេះជោគជ័យ វានឹងមានផលប៉ះពាល់ដល់អាជីពជាកីឡាកររបស់គាត់។ ច្បាប់ La Liga មិនអនុញ្ញាតឲ្យកីឡាករដែលកំពុងលេងមានភាគហ៊ុនក្នុងក្លិបក្នុងលីគដូចគ្នាទេ។ ដូច្នេះ Ramos អាចត្រូវជ្រើសរើសចូលនិវត្តន៍ ឬបន្តអាជីពនៅក្រៅលីកអេស្ប៉ាញ។
Ramos ក៏បានបន្ថែមថា បច្ចុប្បន្នគាត់កំពុងរីករាយជាមួយជីវិតផ្ទាល់ខ្លួន និងចំណាយពេលជាមួយគ្រួសារច្រើនផងដែរ។
