Raphinha ប្តេជ្ញាធ្វើគ្រប់យ៉ាងដើម្បីត្រឡប់មកវិញ ក្រោយរងរបួសធ្ងន់ធ្ងរ ខណៈយុវជនវ័យ ១៩ ឆ្នាំ Rayan ត្រៀមដណ្តើមតំណែង
អត្ថបទសរសេរដោយ Danny • 34 views
ខ្សែប្រយុទ្ធស្លាបរបស់ក្លិប Barcelona កីឡាករ Raphinha បានបង្ហោះសារយ៉ាងមានអត្ថន័យ និងរំជួលចិត្តជាខ្លាំងទៅកាន់អ្នកគាំទ្រ បន្ទាប់ពីរូបគេបានរងរបួសសាច់ដុំភ្លៅខាងស្តាំ នៅក្នុងការប្រកួតដែលប្រេស៊ីលលត់ហៃទី (Haiti) ដែលធ្វើឱ្យយុទ្ធនាការ World Cup របស់គេត្រូវប្រឈមមុខនឹងភាពស្រពិចស្រពិល។
ទោះបីជាត្រូវប្តូរចេញតាំងពីមិនទាន់ចប់តង់ទីមួយ និងត្រូវខកខានការប្រកួតជាបន្តបន្ទាប់ក្តី ប៉ុន្តែសហព័ន្ធបាល់ទាត់ប្រេស៊ីល (CBF) បានបញ្ជាក់ថា ខ្សែប្រយុទ្ធវ័យ ២៩ ឆ្នាំរូបនេះនឹងមិនចាកចេញពីជំរុំហ្វឹកហាត់ត្រឡប់ទៅផ្ទះវិញឡើយ ពោលគឺរូបគេនឹងបន្តស្នាក់នៅជាមួយក្រុមដើម្បីព្យាបាលរបួសយ៉ាងយកចិត្តទុកដាក់បំផុត។
នៅលើបណ្តាញសង្គម Instagram កីឡាករ Raphinha បានបង្ហោះរូបថតកាលពីចូលលេងឱ្យជម្រើសជាតិដំបូងៗ រួមជាមួយសំណេរចាក់ដោតថា៖ «ក្មេងប្រុសដែលធ្លាប់ស្រមៃចង់ពាក់អាវជម្រើសជាតិប្រេស៊ីលម្នាក់នោះ នៅតែស្ថិតនៅទីនេះដដែល។ ខ្ញុំស្រឡាញ់បាល់ទាត់ និងស្រឡាញ់ការលេងឱ្យប្រទេសជាតិរបស់ខ្ញុំបំផុត។ អ្នកដែលស្គាល់ខ្ញុំច្បាស់ ដឹងហើយថាខ្ញុំខំប្រឹងកម្រិតណា។ ខ្ញុំនឹងធ្វើគ្រប់យ៉ាងតាមដែលអាចធ្វើទៅបាន (I will do everything in my power) ដើម្បីជាសះស្បើយ និងត្រឡប់មកវិញឱ្យលឿនបំផុត»។
ការអវត្តមានរបស់ Raphinha នៅក្នុងជំនួបកាត់សេចក្តីចុងក្រោយក្នុងពូល C ទល់នឹងក្រុមស្កុតឡែន (Scotland) នាថ្ងៃពុធនេះ បានធ្វើឱ្យលោកគ្រូបង្វឹក Carlo Ancelotti ត្រូវស្វែងរកអ្នកជំនួសតំណែងជាបន្ទាន់។ បច្ចុប្បន្ន យុវជនវ័យក្មេង ១៩ ឆ្នាំរបស់ក្លិប Bournemouth គឺកីឡាករ Rayan កំពុងតែមានភាគរយខ្ពស់ជាងគេក្នុងការទទួលបានឱកាសលេងក្នុងជម្រើសដំបូងនៅស្លាបស្តាំ ទោះបីជាមានជម្រើសល្អៗផ្សេងទៀតដូចជា Neymar ដែលទើបតែជាសះស្បើយ, Luiz Henrique, Gabriel Martinelli និង Endrick កំពុងរង់ចាំឱកាសដូចគ្នាក៏ដោយ។
