Ralf Rangnick ថា Lamine Yamal អាចឈានដល់កម្រិតដូច Lionel Messi បើបន្តរក្សាភាពដាក់ខ្លួន
អត្ថបទសរសេរដោយ Danny • 39 views
គ្រូបង្វឹកក្រុមជម្រើសជាតិអូទ្រីស លោក Ralf Rangnick បានលើកសរសើរកីឡាករវ័យក្មេង Lamine Yamal ថាជាកំពូលតារាឆ្នើមមួយរូបនាពេលអនាគត បន្ទាប់ពីខ្សែប្រយុទ្ធស្លាបរបស់ក្លិប Barcelona រូបនេះបានជួយឱ្យក្រុមកងទ័ពគោជល់អេស្ប៉ាញ (Spain) លត់អារ៉ាប៊ីសាអូឌីត យ៉ាងចាស់ដៃក្នុងលទ្ធផល ៤-០ នៅក្នុងព្រឹត្តិការណ៍ World Cup 2026។
អតីតគ្រូបង្វឹករបស់ក្លិប Manchester United រូបនេះ បានថ្លែងប្រាប់សារព័ត៌មាន Mundo Deportivo ទាំងក្តីស្ញប់ស្ញែង និងបានយកទៅប្រៀបធៀបជាមួយវីរៈបុរសបាល់ទាត់ពិភពលោក Lionel Messi ថា៖ «អេស្ប៉ាញ គឺជាក្រុមដែលគ្មាននរណាម្នាក់ចង់ប្រឈមមុខឡើយ។ ពួកគេជាប្រទេសដែលបានបង្កើតប្រវត្តិសាស្ត្របាល់ទាត់ក្នុងរយៈពេលប៉ុន្មានឆ្នាំចុងក្រោយនេះ ហើយអ្វីដែលរឹតតែពិសេសនោះ គឺពួកគេមាន Lamine Yamal ដែលជាកំពូលតារាឆ្នើម (Superstar) ដ៏ពិតប្រាកដម្នាក់សម្រាប់ថ្ងៃអនាគត។ ខ្ញុំគិតថា ប្រសិនបើគេមិនមានបញ្ហារបួស និងបន្តរក្សាភាពដាក់ខ្លួន (Keep his feet on the ground) នោះគេនឹងអាចឈានទៅដល់កម្រិតមួយដ៏អស្ចារ្យប្រហាក់ប្រហែលនឹង Lionel Messi មិនខានឡើយ»។
នៅក្នុងជំនួបឈ្នះអារ៉ាប៊ីសាអូឌីត ៤-០ នោះ Yamal វ័យ ១៨ ឆ្នាំ ត្រូវការពេលត្រឹមតែ ១០ នាទីប៉ុណ្ណោះដើម្បីស៊ុតគ្រាប់បើកឆាក។ ទោះជាយ៉ាងណា ដោយសារតែរូបគេទើបតែរងរបួសកាលពីចុងរដូវកាលមុន គ្រូបង្វឹកលោក Luis de la Fuente បានសម្រេចចិត្តប្តូរគេចេញនៅតង់ទីពីរ ដើម្បីគ្រប់គ្រងកម្លាំង និងថែរក្សាកាយសម្បទារបស់គេឱ្យបានល្អបំផុតសម្រាប់ត្រៀមលេងក្នុងវគ្គបន្តបន្ទាប់។ កាលពីជំនួបបើកឆាកដែលស្មើកាប់វែរ (Cape Verde) ០-០ គេក៏ត្រូវបានដាក់ឱ្យចូលលេងត្រឹមតែវគ្គទីពីរផងដែរ។ ពេលនេះ អេស្ប៉ាញកំពុងត្រៀមខ្លួនសម្រាប់ជំនួបដ៏សំខាន់បន្ទាប់ទល់នឹងក្រុមអ៊ុយរូហ្គាយ (Uruguay) ដើម្បីប្រជែងតំណែងកំពូលតារាងប្រចាំពូល។
