PSG គ្រោងផ្ដល់ "កិច្ចសន្យាអស់មួយជីវិត" ជូនលោក Luis Enrique ក្រោយដឹកនាំឈ្នះពានទី ៩

ក្លិប Paris Saint-Germain ត្រូវបានរាយការណ៍ថា កំពុងរៀបចំសំណើកិច្ចសន្យាដែលមិនធ្លាប់មានពីមុនមកក្នុងប្រវត្តិសាស្ត្របាល់ទាត់អឺរ៉ុបជូនលោក Luis Enrique បន្ទាប់ពីលោកបានដឹកនាំក្រុមឱ្យទទួលបានជោគជ័យជាប្រវត្តិសាស្ត្រក្នុងឆ្នាំ ២០២៥។ លោក Enrique បានជួយ PSG ឱ្យលើកពាន Champions League ជាលើកដំបូងក្នុងប្រវត្តិសាស្ត្រក្លិបកាលពីរដូវកាលមុន បំបែកកំណត់ត្រាដែលក្លិបខំប្រឹងអស់ជាង ១០ ឆ្នាំ។ ក្នុងចំណោម ១៤៣ ប្រកួត លោកទទួលបានជោគជ័យខ្ពស់ (ឈ្នះ ៩៨ ស្មើ ២៦ និងចាញ់ត្រឹម ១៩) ដែលស្មើនឹងអត្រាឈ្នះរហូតដល់ ៦៨.៥៣%។ លោកក៏បានដឹកនាំក្រុមឱ្យឈ្នះពានរង្វាន់នេះផងដែរ ដោយបានយកឈ្នះក្រុម Flamengo ក្នុងឆ្នាំ ២០២៥ នេះ។ ដោយសារកិច្ចសន្យាបច្ចុប្បន្ននឹងផុតកំណត់នៅឆ្នាំ ២០២៧ ថ្នាក់ដឹកនាំ PSG ចង់ផ្តល់ "កិច្ចសន្យាអស់មួយជីវិត" ឱ្យលោក Enrique ដើម្បីក្លាយជាអ្នកចាត់ការរយៈពេលវែង និងជាអ្នកកសាងអត្តសញ្ញាណថ្មីរបស់ក្លិប។ ក្លិបចាត់ទុកលោកជាសសរទ្រូងដ៏សំខាន់ ដែលអាចរក្សានិរន្តរភាពនៃភាពជោគជ័យ មិនមែនគ្រាន់តែឈ្នះពានមួយឆាវនោះទេ។

ចាប់តាំងពី Kylian Mbappe ចាកចេញទៅ Real Madrid លោក Enrique បានរកឃើញតុល្យភាពក្រុមយ៉ាងល្អ ដោយផ្ដោតលើការទទួលខុសត្រូវរួមជាសមូហភាព មិនផ្អែកលើតារាឆ្នើមតែម្នាក់។ លោកមានអំណាចពេញលេញក្នុងការដាក់កីឡាករណាម្នាក់ឱ្យអង្គុយបម្រុងប្រសិនបើមិនខំប្រឹង។ ក្រោមការដឹកនាំរបស់លោក Ousmane Dembélé បានវិវត្តខ្លួនរហូតឈ្នះពានរង្វាន់ Ballon d’Or និង The Best FIFA Men’s Player។ លោក Enrique បានបញ្ជាក់ថា ឆ្នាំ ២០២៥ គឺជាឆ្នាំប្រវត្តិសាស្ត្រសម្រាប់អ្នកគាំទ្រទីក្រុងប៉ារីស។ បច្ចុប្បន្នលោកចង់ឱ្យកីឡាករសម្រាកក្នុងឱកាសបុណ្យគ្រីស្មាសឱ្យបានពេញលេញ មុននឹងត្រលប់មកវិញដើម្បីប្រជែងពានរង្វាន់ដែលនៅសេសសល់ក្នុងរដូវកាលនេះ។ PSG បានរកឃើញ "រូបមន្តជោគជ័យ" ក្រោមការដឹកនាំរបស់លោក Luis Enrique ហើយក្លិបកំពុងធ្វើគ្រប់យ៉ាងដើម្បីរក្សាលោកទុកឱ្យនៅដឹកនាំរយៈពេលវែងបំផុតតាមដែលអាចធ្វើទៅបាន។