៩គ្រាប់កើតឡើងក្នុងជំនួប Paris Saint-Germain និង Bayern Munich ខណៈ Harry Kane បង្កើតកំណត់ត្រាថ្មី
អត្ថបទសរសេរដោយ Dany • 63 views
៩គ្រាប់បានកើតឡើងនៅជើងទី១ វគ្គពាក់កណ្តាលផ្តាច់ព្រ័ត្រ UEFA Champions League ក្នុងជំនួបដែល Paris Saint-Germain ឈ្នះ Bayern Munich ៥-៤។ Harry Kane ក៏បានក្លាយជាកីឡាករអង់គ្លេសដំបូងគេ ដែលអាចរកគ្រាប់បាល់បានក្នុង ៦ប្រកួតជាប់គ្នា ហើយគេជឿជាក់ថាក្រុមអាល្លឺម៉ង់អាចវាយបកបាននៅជើងទី២។
នៅកីឡដ្ឋាន Parc des Princes ក្រុងប៉ារីស Harry Kane បើកការនាំមុខឲ្យ Bayern Munich នៅនាទី១៧ ពីបាល់ប៉េណាល់ទី។ បន្ទាប់មក Khvicha Kvaratskhelia តាមស្មើឲ្យ PSG មុនពេល Joao Neves បន្ថែមគ្រាប់ទី២។ មុនបញ្ចប់វគ្គទី១ ក្រុមទាំងពីរបន្ថែមគ្រាប់ម្នាក់ទៀត ដោយ Michael Olise និង Ousmane Dembele ធ្វើឲ្យលទ្ធផលក្លាយជា ៣-២។
ចូលវគ្គទី២ ការប្រកួតនៅតែខ្លាំងដដែល។ Kvaratskhelia រកបានគ្រាប់ទី២របស់ខ្លួន ខណៈ Dembele ក៏បន្ថែមគ្រាប់មួយទៀត ឲ្យ PSG នាំមុខ ៥-២។ ប៉ុន្តែ Bayern Munich មិនចុះសម្រុងឡើយ ដោយ Dayot Upamecano និង Luis Diaz រកបានម្នាក់មួយគ្រាប់ ធ្វើឲ្យលទ្ធផលចុងក្រោយ ៥-៤។
គ្រាប់បាល់របស់ Kane ក្នុងជំនួបនេះ បានធ្វើឲ្យគេបង្កើតកំណត់ត្រាថ្មី ជាកីឡាករអង់គ្លេសដំបូងគេ ដែលរកបានគ្រាប់បាល់ ៦ប្រកួតជាប់គ្នា នៅក្នុង Champions League។
Kane ក៏បានបញ្ជាក់ថា ក្រុមខ្លួននៅមានឱកាសវាយបកនៅជើងទី២៖ «ពេលយើងត្រលប់ទៅលេងក្នុងទឹកដីខ្លួន មានអ្នកគាំទ្រជួយគាំទ្រ ខ្ញុំជឿថាវានឹងជួយឲ្យយើងមានប្រៀប និងអាចយកជ័យជម្នះបាន»។
សម្រាប់ជំនួបមួយគូទៀត វគ្គពាក់កណ្តាលផ្តាច់ព្រ័ត្រ រវាង Atletico Madrid និង Arsenal នឹងធ្វើឡើងនៅថ្ងៃទី២៩ ខែមេសា៕
