គ្រូបង្វឹក Monaco បកស្រាយជុំវិញ "ក្ដីបារម្ភ" លើស្ថានភាពរបស់ Paul Pogba
អត្ថបទសរសេរដោយ Bonat • 85 views
លោក Sebastien Pocognoli គ្រូបង្វឹករបស់ក្លិប Monaco បានចេញមុខមកបកស្រាយ និងកាត់បន្ថយភាពតានតឹងជុំវិញការអវត្តមានជាបន្តបន្ទាប់របស់ខ្សែបម្រើ Paul Pogba ដោយលោកសង្កត់ធ្ងន់ថា "ការអត់ធ្មត់" គឺជាកត្តាចាំបាច់បំផុតនាពេលនេះ។ Pogba នឹងត្រូវសម្រាកម្តងទៀតក្នុងការប្រកួតពានរង្វាន់ Coupe de France ជាមួយ Auxerre។ ចាប់តាំងពីផ្ទេរមក Monaco កាលពីរដូវក្តៅ គេទើបតែបង្ហាញខ្លួនបាន ៣ ដងប៉ុណ្ណោះក្នុងនាមជាកីឡាករបម្រុង ហើយមិនទាន់បានចូលលេងក្នុង Champions League នៅឡើយទេ។ លោក Pocognoli យល់ថាការដែល Pogba អាចត្រលប់មកលេងបាល់វិញបាន ក្រោយជាប់បម្រាមដូពីង (Doping) អស់រយៈពេលជិត ២ ឆ្នាំ គឺជា "រឿងដ៏អស្ចារ្យ" រួចទៅហើយ។ លោកមិនចង់បង្ខំទេ ប៉ុន្តែចង់ឱ្យកីឡាករវ័យ ៣២ ឆ្នាំរូបនេះ ត្រៀមខ្លួនឱ្យបាន ១០០% ទាំងកាយសម្បទា និងស្មារតីមុននឹងដាក់ឱ្យលេងទៀងទាត់។
ការត្រលប់មកវិញរបស់ Pogba ជួបការរអាក់រអួលដោយសារបញ្ហាកាយសម្បទាបន្តិចបន្តួច និងការផ្លាស់ប្តូរគ្រូបង្វឹកភ្លាមៗ (ពីលោក Adolf Hutter មកលោក Pocognoli)។ ទោះបីជាមិនទាន់រកបានគ្រាប់បាល់ ឬ Assist ក៏ដោយ ប៉ុន្តែ Pogba នៅតែមានសង្ឃឹមខ្ពស់ក្នុងការបង្ហាញទម្រង់លេងល្អឡើងវិញ ដើម្បីដណ្តើមកៅអីក្នុងក្រុមជម្រើសជាតិបារាំងសម្រាប់ព្រឹត្តិការណ៍ World Cup 2026។ Monaco នឹងបញ្ចប់ការប្រកួតមុនដាច់ឆ្នាំដោយគ្មានវត្តមាន Pogba។ ការសម្រាករដូវរងានៅ Ligue 1 នឹងក្លាយជាឱកាសដ៏ល្អសម្រាប់ "Captain America" រូបនេះ ក្នុងការហ្វឹកហាត់ពង្រឹងកម្លាំងដោយស្ងប់ស្ងាត់ ដើម្បីត្រៀមខ្លួនសម្រាប់ពាក់កណ្តាលរដូវកាលទី ២ ក្នុងឆ្នាំ ២០២៦ ខាងមុខ។
