Michael Owen ចេញមុខគាំទ្រ CR7 ឱ្យស៊ុត Hat-trick វាយបកបំបិទមាត់អ្នករិះគន់ក្នុងជំនួបបន្ទាប់
អត្ថបទសរសេរដោយ Danny • 36 views
អតីតខ្សែប្រយុទ្ធឆ្នើមរបស់ក្រុមជម្រើសជាតិតោបីអង់គ្លេស លោក Michael Owen បានចេញមុខមកការពារកំពូលខ្សែប្រយុទ្ធ Cristiano Ronaldo យ៉ាងស្វិតស្វាញ បន្ទាប់ពីប្រធានក្រុមព័រទុយហ្កាល់រូបនេះ រងការរិះគន់យ៉ាងចាស់ដៃជុំវិញទម្រង់លេងមិនសូវលេចធ្លោ ក្នុងជំនួបបើកឆាកដែលព័រទុយហ្កាល់ស្មើក្រុមសាធារណរដ្ឋប្រជាធិបតេយ្យកុងហ្គោ (DR Congo) ១-១ នៅក្នុងព្រឹត្តិការណ៍ World Cup 2026។
ការរិះគន់លើទម្រង់លេងរបស់ Ronaldo បានផ្ទុះឡើងកាន់តែខ្លាំង ដោយសារតែវាបានកើតឡើងស្របពេលដ៏ផ្ទុយស្រឡះមួយថ្ងៃ បន្ទាប់ពីគូប្រជែងដ៏ធំរបស់គេ គឺ Lionel Messi បានស៊ុតបញ្ចូលទីម្នាក់ឯង ៣ គ្រាប់ (Hat-trick) ជួយឱ្យអាហ្សង់ទីនលត់អាលហ្សេរី ៣-០។ យ៉ាងណាមិញ នៅក្នុងអត្ថបទសរសេរឱ្យសារព័ត៌មាន Daily Mail លោក Michael Owen បានបដិសេធដាច់អហង្ការចំពោះការវាយប្រហារលើខ្សែប្រយុទ្ធវ័យ ៤១ ឆ្នាំរូបនេះ ដោយលោកបានលើកឡើងថា៖ «វាមិនមែនជាការផ្តល់ផលចំណេញសម្រាប់ Cristiano Ronaldo ឡើយ ដែល Lionel Messi បានស៊ុត Hat-trick កាលពីយប់មិញ មុនពេលព័រទុយហ្កាល់ត្រូវលេង ប៉ុន្តែខ្ញុំមិនយល់ស្របនឹងការរិះគន់ទាំងឡាយលើរូបគេនោះទេ»។
អតីតតារាឆ្នើមរបស់ក្លិប Real Madrid និង Manchester United រូបនេះបានពន្យល់ពីទម្រង់លេងបច្ចុប្បន្នរបស់ CR7 ថា គេបានផ្លាស់ប្តូរមកជាខ្សែប្រយុទ្ធដែលចាំតែបញ្ចប់ទីនៅក្នុងប្រអប់គ្រោះថ្នាក់ (Penalty-box poacher) ប៉ុណ្ណោះ។ លោក Owen បានបន្ថែមថា៖ «ប៉ុន្តែតើកន្លងមកគេមិនដែលលេងបែបនេះទេឬ? ពិសេសក្នុងរយៈពេលប៉ុន្មានឆ្នាំចុងក្រោយនេះ គេមិនមែនជាកីឡាករដែលត្រូវចុះមកពាក់ព័ន្ធនឹងការស្ថាបនាហ្គេមទូទៅឡើយ។ ប៉ុន្តែគេនឹងមានវត្តមាននៅទីនោះសម្រាប់ខណៈពេលដ៏សំខាន់ (Big moments)។ ប្រសិនបើគេរកគ្រាប់បាល់មិនបាន វាគឺជារឿងងាយស្រួលពេកហើយក្នុងការទម្លាក់កំហុសលើ Ronaldo»។
ទោះបីជាបច្ចុប្បន្ន កំពូលខ្សែប្រយុទ្ធរបស់ក្លិប Al-Nassr រូបនេះ កំពុងជួបប្រទះនូវការខ្សត់គ្រាប់បាល់ក្នុងការប្រកួតពានរង្វាន់ធំឱ្យជាតិចំនួន ១០ ប្រកួតជាប់គ្នាក៏ដោយ ក៏លោក Owen នៅតែមានទំនុកចិត្តខ្ពស់ថា Ronaldo នឹងអាចស្វែងរកទម្រង់លេងដ៏មុតស្រួចរបស់គេឃើញវិញក្នុងពេលឆាប់ៗ។ លោកបានសង្កត់ធ្ងន់នៅចុងបញ្ចប់ថា៖ «តើមានប៉ុន្មានដងហើយដែលរឿងបែបនេះបានកើតឡើង ហើយគេបានបំបិទមាត់អ្នករាល់គ្នានៅក្នុងការប្រកួតបន្ទាប់? ខ្ញុំនឹងមិនមានការភ្ញាក់ផ្អើលឡើយ ប្រសិនបើគេវាយបកវិញដោយការស៊ុត Hat-trick ផ្ទាល់ខ្លួន ក្នុងការប្រកួតទល់នឹងអ៊ូសបេគីស្ថាន»។
ក្រុមព័រទុយហ្កាល់របស់លោក Roberto Martinez ត្រូវតែស្វែងរកជ័យជម្នះ និងទម្រង់លេងដ៏មុតស្រួចរបស់ខ្លួនឡើងវិញជាដាច់ខាត នៅក្នុងការប្រកួតទីពីរនៃពូល Group K ទល់នឹងក្រុមជម្រើសជាតិអ៊ូសបេគីស្ថាន (Uzbekistan) នាថ្ងៃអង្គារនេះ ដើម្បីរក្សាឱកាសក្នុងការឡើងទៅវគ្គបន្ត និងបន្តក្តីស្រមៃដណ្តើមពានរង្វាន់ពិភពលោកចុងក្រោយរបស់ប្រធានក្រុមជើងចាស់រូបនេះ។
