Michael Carrick ក្លាយជាបេក្ខភាពដ៏ខ្លាំងសម្រាប់តំណែងគ្រូបង្វឹក Manchester United ខណៈ Paul Parker បង្ហាញពីកត្តាសំខាន់មួយ
អត្ថបទសរសេរដោយ Dany • 51 views
លោក Michael Carrick កំពុងក្លាយជាបេក្ខភាពដ៏ខ្លាំង សម្រាប់តំណែងគ្រូបង្វឹកពេញសិទ្ធិនៅ Manchester United បន្ទាប់ពីការដឹកនាំជោគជ័យក្នុងតួនាទីបណ្តោះអាសន្ន។ អតីតកីឡាករ Paul Parker បានបញ្ជាក់ថា មានចំណុចសំខាន់មួយ ដែលធ្វើឲ្យគាត់ឈានដល់កម្រិតនេះ។
ក្រោយពីបានទទួលតួនាទីនៅខែ មករា ឆ្នាំនេះ Carrick បានដឹកនាំក្រុមឈ្នះ 8 ប្រកួត ក្នុងចំណោម 12 ប្រកួត ធ្វើឲ្យ Man Utd ឡើងដល់ចំណាត់ថ្នាក់លេខ 3 ក្នុងតារាង Premier League ហើយកំពុងមានឱកាសទៅលេង Champions League។
លោក Parker បាននិយាយថា កត្តាសំខាន់បំផុតសម្រាប់អនាគតរបស់ Carrick គឺលទ្ធផលចុងក្រោយរបស់ក្រុម។
“ប្រសិនបើគាត់អាចនាំក្រុមទៅលេង Champions League នោះគាត់សមនឹងទទួលបានតំណែងនេះ”
គាត់ក៏បានបញ្ជាក់ថា Manchester United មិនចាំបាច់ត្រូវការគ្រូបង្វឹកដែលមានឈ្មោះល្បីជានិច្ចឡើយ ដោយលើកឧទាហរណ៍ពី Sir Alex Ferguson ដែលបានចូលមកដឹកនាំក្លិប ទោះមិនមែនជាគ្រូបង្វឹកល្បីខ្លាំងក៏ដោយ ប៉ុន្តែបានបង្កើតប្រវត្តិសាស្ត្រដ៏អស្ចារ្យ។
ចំណុចដែលត្រូវបានចាត់ទុកថា ជាការសម្រេចចិត្តល្អបំផុតរបស់ Carrick គឺការនាំយកគ្រូបង្វឹក Steve Holland មកធ្វើជាជំនួយការជួយការងារ។
លោក Parker បាននិយាយថា៖
“គាត់មិនជ្រើសរើសមិត្តចាស់ទេ ប៉ុន្តែជ្រើសរើសមនុស្សដែលមានបទពិសោធន៍ខ្ពស់ជាងខ្លួន។ នេះបង្ហាញថាគាត់ចង់រៀន និងអភិវឌ្ឍខ្លួនឯង”
ការសម្រេចចិត្តនេះត្រូវបានប្រៀបធៀបជាមួយវិធីសាស្ត្ររបស់ Ferguson ដែលតែងតែនាំយកអ្នកជំនាញល្អៗមកជួយ ដើម្បីបង្កើនកម្លាំងក្រុម។
បើទោះបីមានការជជែកអំពីការនាំយកគ្រូបង្វឹកឈ្មោះធំផ្សេងៗក៏ដោយ Carrick កំពុងបង្ហាញថា គាត់អាចជាជម្រើសដ៏ល្អ ដោយផ្អែកលើលទ្ធផល និងវិធីដឹកនាំ។
ចុងក្រោយ Parker បានបញ្ជាក់ថា ការនាំក្រុមទៅ Champions League គឺគ្រប់គ្រាន់ ដើម្បីឲ្យ Carrick ទទួលបានឱកាសដឹកនាំក្រុមជាផ្លូវការ នៅរដូវកាលក្រោយ។
