អតីតខ្សែប្រយុទ្ធ របស់ Manchester United គឺ Louis Saha បានបញ្ជាក់ថា Marcus Rashford អាចគ្មានអនាគតនៅ Manchester United ទៀតនោះទេប្រសិនគាត់ប្រលប់ទៅទីនោះវិញ
អត្ថបទសរសេរដោយ Dany • 52 views
តារាបាល់ទាត់អង់គ្លេស Marcus Rashford ត្រូវបានអតីតខ្សែប្រយុទ្ធ Louis Saha បញ្ជាក់ថា “ពេលវេលារបស់គាត់បានកន្លងផុតហើយ” នៅ Manchester United ហើយត្រូវបានគេមើលឃើញថាគ្មានអនាគតនៅកីឡដ្ឋាន Old Trafford ទៀតទេ ទោះបីជា Barcelona មិនយល់ព្រមបង់តម្លៃផ្ទេរ £26 លានដុល្លារក៏ដោយ។
ខ្សែប្រយុទ្ធវ័យ ២៨ឆ្នាំ ដែលកំពុងលេងខ្ចីជើងនៅ Barcelona ក្នុងរដូវកាល ២០២៥-២៦ បានបង្ហាញទម្រង់លេងល្អ ដោយរកបាន ១៣គ្រាប់ និងបញ្ជូន ១០ដង។ ទោះជាយ៉ាងណា អនាគតរបស់គាត់នៅតែស្ថិតក្នុងភាពមិនច្បាស់លាស់ ព្រោះក្លិបកាតាឡានមិនចង់បង់តម្លៃពេញ ខណៈ Manchester United ក៏មិនចង់បន្ថយតម្លៃ។
Rashford ដែលធ្លាប់ជាកីឡាករបណ្តុះបណ្តាលពីអាគាដេមីរបស់ក្លិប បានឡើងលេងជាលើកដំបូងក្រោមការដឹកនាំរបស់ Louis van Gaal នៅឆ្នាំ២០១៦ ហើយក៏បានក្លាយជាកីឡាករវ័យក្មេងបំផុតដែលរកគ្រាប់បាល់បានសម្រាប់ក្រុមជម្រើសជាតិអង់គ្លេស។ ប៉ុន្តែបន្ទាប់ពីឈានដល់កំពូលក្នុងរដូវកាល ២០២២-២៣ ទម្រង់លេងរបស់គាត់បានធ្លាក់ចុះយ៉ាងខ្លាំង។
អតីតខ្សែប្រយុទ្ធ Louis Saha បានបង្ហាញមតិយ៉ាងត្រង់ថា ការត្រលប់ទៅ Manchester United នឹងក្លាយជាជម្រើសទី៣សម្រាប់ Rashford ហើយគាត់បានបន្ថែមថា ការចាកចេញពីក្លិបជាកីឡាករខ្ចីជើងនេះបានបង្ហាញពីបំណងច្បាស់ថាគាត់មិនចង់បន្តនៅទីនោះទៀតទេ។
«ខ្ញុំគិតថាពេលវេលារបស់គាត់នៅទីនោះបានបញ្ចប់ហើយ។ ការត្រលប់មកវិញនឹងមិនមែនជាជម្រើសល្អទេ ហើយខ្ញុំជឿថាគាត់នឹងស្វែងរកក្លិបថ្មីមួយផ្សេងទៀត»។
ទោះបីមានការផ្លាស់ប្តូរគ្រូបង្វឹក និងបរិយាកាសថ្មីនៅក្លិបក៏ដោយ អនាគតរបស់ Rashford នៅ Old Trafford ហាក់បីដូចជាបានបិទទ្វារជិតទៅហើយ ការផ្ទេរទៅក្លិបផ្សេងទៀតនៅរដូវកាលក្រោយ គឺជាជម្រើសដែលអាចកើតឡើងខ្លាំងបំផុតសម្រាប់គាត់៕
