Manchester United បង្អង់ការសម្រេចចិត្តលើអនាគតរបស់ Joshua Zirkzee
អត្ថបទសរសេរដោយ Bonat • 92 views
ក្លិប Manchester United បានសម្រេចចិត្តពន្យារពេលការសម្រេចចិត្តថាតើត្រូវលក់ខ្សែប្រយុទ្ធ Joshua Zirkzee ចេញនាខែមករាខាងមុខឬយ៉ាងណា ទោះបីជាមានការចាប់អារម្មណ៍ខ្លាំងពីក្លិប West Ham និង Roma ក៏ដោយ។ បច្ចុប្បន្នគ្រូបង្វឹកលោក Ruben Amorim កំពុងខ្វះជម្រើសក្នុងតំបន់ប្រយុទ្ធ ដោយសារ Bryan Mbeumo និង Amad Diallo ត្រូវទៅជួយជាតិនៅពាន AFCON ខណៈដែលប្រធានក្រុម Bruno Fernandes កំពុងរងរបួស។ ទោះបីជា Zirkzee ស្ថិតនៅក្រោមជម្រើសរបស់ Benjamin Sesko និង Matheus Cunha ក៏ដោយ ប៉ុន្តែក្លិបត្រូវការរក្សាកីឡាករដែលមានបទពិសោធន៍ទុកសម្រាប់បង្វិលសមាជិក ក្នុងអំឡុងពេលមមាញឹកនេះ។ បន្ទាប់ពីខកខានក្នុងការទាក់ទាញ Antoine Semenyo (ដែលចង់ទៅ Man City) United កាន់តែប្រុងប្រយ័ត្នមិនហ៊ានបញ្ចេញខ្សែប្រយុទ្ធដែលមានស្រាប់។
រដូវកាលនេះ Zirkzee បង្ហាញខ្លួនបាន ១១ ប្រកួត (ជម្រើសដំបូង ៤ ដង) និងស៊ុតបញ្ចូលទីបានត្រឹមតែ ១ គ្រាប់ ប៉ុណ្ណោះក្នុងជំនួបទល់នឹង Crystal Palace។ បន្ទាប់ពីទទួលបានឱកាសលេងដំបូង ៣ ប្រកួតជាប់គ្នាកាលពីខែមុន រូបគេបានត្រលប់ទៅអង្គុយបម្រុងវិញ ដោយចូលលេងបានត្រឹម ២៤ នាទីប៉ុណ្ណោះក្នុង ៣ ប្រកួតចុងក្រោយ។ West Ham និង Roma កំពុងតាមដានយ៉ាងដិតដល់ ដោយ United បោះតម្លៃខ្លួនប្រហែល ៣០.៥ លានផោន។ AC Milan ដែលធ្លាប់ចង់បាន Zirkzee បានដកខ្លួនវិញ ដោយសារពួកគេជិតសម្រេចកិច្ចព្រមព្រៀងទិញយក Niclas Fullkrug ពី West Ham ជំនួសវិញ។ Manchester United នឹងរង់ចាំរហូតដល់ដាច់ខែមករា ទើបសម្រេចចិត្តជាថ្មីលើអនាគតរបស់ Zirkzee ដើម្បីធានាថាពួកគេមានកីឡាករគ្រប់គ្រាន់សម្រាប់ប្រកួតប្រជែង ខណៈដែលរូបគេអាចនឹងទទួលបានឱកាសបង្ហាញខ្លួនច្រើនជាងមុនក្នុងអំឡុងពេលដែលមិត្តរួមក្រុមផ្សេងទៀតអវត្តមាន។
