Manchester United សម្រេចកិច្ចព្រមព្រៀងទិញដីធំមួយ ដើម្បីត្រៀមសាងសង់ស្តាតថ្មី ដែលអាចផ្ទុកទស្សនិកជនបានរហូតដល់ទៅ 100,000 នាក់
អត្ថបទសរសេរដោយ Danny • 35 views
ក្លិបបិសាចក្រហម Manchester United បានបោះជំហានទៅមុខយ៉ាងសំខាន់មួយទៀត ក្នុងការធ្វើឱ្យក្តីស្រមៃបង្កើតកីឡដ្ឋាន «Wembley ភាគខាងជើង» ក្លាយជាការពិត បន្ទាប់ពីសម្រេចកិច្ចព្រមព្រៀងទិញយកដីទំហំ ២៥ អាក្រ (Acres) ពីក្រុមហ៊ុន Indurent ដែលមានចម្ងាយត្រឹមតែ ៣៥០ ម៉ែត្រពីកីឡដ្ឋាន Old Trafford បច្ចុប្បន្ន។ នេះបើតាមការចុះផ្សាយរបស់សារព័ត៌មាន Manchester Evening News។
ការទិញបានដីធំដុំនេះ មានន័យថា Man Utd កំពុងក្តោបក្តាប់ដីភាគច្រើនដែលត្រូវការចាំបាច់ ដើម្បីចាប់ផ្តើមគម្រោងសាងសង់មហាកីឡដ្ឋានថ្មី ដែលអាចផ្ទុកទស្សនិកជនបានរហូតដល់ទៅ ១០០,០០០ នាក់។
ជុំវិញរឿងកាលបរិច្ឆេទនៃការបើកសម្ពោធវិញ ក្លិបបានរំកិលការរំពឹងទុករបស់ខ្លួនបន្តិច ដោយសារគម្រោងដំបូងដែលគ្រោងនឹងឱ្យរួចរាល់នៅឆ្នាំ ២០៣០ នោះ ត្រូវបានចាត់ទុកថាជារឿងមិនសូវប្រាកដប្រជា និងមិនអាចទៅរួចឡើយ។ ផ្ទុយទៅវិញ ដំណើរការសាងសង់ត្រូវបានគេរំពឹងថានឹងប្រើពេលប្រហែល ៥ ឆ្នាំ គិតចាប់តាំងពីថ្ងៃបុកគ្រឹះដំបូង។ ដូច្នេះ ពេលវេលាដ៏សមស្រប និងច្បាស់លាស់បំផុតសម្រាប់ការបើកទ្វារកីឡដ្ឋានតម្លៃ ២ ពាន់លានផោននេះ គឺនៅមុនឆ្នាំ ២០៣៥។
កាលបរិច្ឆេទនេះ គឺស្របពេលទៅនឹងផែនការយុទ្ធសាស្ត្ររបស់ក្លិប ដែលមានបំណងចង់ដាក់ពាក្យស្នើសុំធ្វើជាម្ចាស់ផ្ទះនៃការប្រកួតពានរង្វាន់បាល់ទាត់ពិភពលោកផ្នែកនារី FIFA Women's World Cup 2035 ផងដែរ។ បច្ចុប្បន្ន ការរចនាប្លង់កីឡដ្ឋានត្រូវបានចាប់ផ្តើមឡើងវិញហើយ ក្រោមការត្រួតពិនិត្យពីក្រុមហ៊ុនស្ថាបត្យកម្មល្បីឈ្មោះ Foster + Partners។
បន្ទាប់ពីជោគជ័យលើការទិញដីនេះ លោកស្រី Collette Roche នាយកប្រតិបត្តិនៃគម្រោងអភិវឌ្ឍន៍កីឡដ្ឋានថ្មីរបស់ Man Utd បានមានប្រសាសន៍ថា៖ «ព័ត៌មាននៅថ្ងៃនេះបានបង្ហាញពីវឌ្ឍនភាពដែលយើងកំពុងធ្វើឆ្ពោះទៅរកផ្ទះថ្មីលំដាប់ពិភពលោកសម្រាប់ Manchester United ហើយវាជាចំណុចរបត់ដ៏សំខាន់មួយ នៅពេលដែលយើងឈានចូលទៅកាន់ដំណាក់កាលបន្ទាប់នៃការអភិវឌ្ឍន៍»។
