Manchester City គ្រោងជះលុយជាង ២០០ លានផោន ឆ្មក់យក Elliot Anderson និង Sandro Tonali មកពង្រឹងតំបន់បម្រើ
អត្ថបទសរសេរដោយ Danny • 37 views
ក្លិបមេឃខៀវ Manchester City កំពុងតែរៀបចំផែនការបដិវត្តន៍តំបន់បម្រើដ៏ធំមួយនារដូវក្តៅនេះ ដើម្បីរៀបចំខ្លួនឈានចូលទៅកាន់យុគសម័យថ្មីក្រោយការចាកចេញរបស់លោក Pep Guardiola។ យោងតាមការចុះផ្សាយរបស់សារព័ត៌មាន Manchester Evening News ក្លិបយក្សនៃលីគកំពូល Premier League មួយនេះ បានកំណត់មុខសញ្ញាយ៉ាងច្បាស់ៗលើការទិញយកកីឡាករផ្កាយព្រឹកពីររូបក្នុងពេលតែមួយ គឺកីឡាករ Elliot Anderson របស់ក្រុម Nottingham Forest និងតារាឆ្នើម Sandro Tonali របស់ក្រុម Newcastle United។
ការដេញថ្លៃយក Elliot Anderson កំពុងតែជួបឧបសគ្គធំ ដោយសារតែខាងក្លិប Forest គឺជាអ្នកចរចាដ៏ស្វិតស្វាញបំផុត។ Man City ត្រូវបានរាយការណ៍ថា បានរងការបដិសេធសំណើដេញថ្លៃតម្លៃ ១០៦ លានផោនរួចទៅហើយ ខណៈដែលក្រុម Forest កំពុងតែទាមទារតម្លៃខ្លួនខ្ពស់ជាង ១២៥ លានផោន (ដែលជាតម្លៃ Liverpool ទិញ Alexander Isak) ដើម្បីបង្កើតកំណត់ត្រាផ្ទេរកីឡាករថ្លៃជាងគេបំផុតក្នុងប្រវត្តិសាស្ត្រចក្រភពអង់គ្លេស (British transfer record)។ ទោះជាយ៉ាងណា ថ្នាក់ដឹកនាំ Man City នៅតែមានជំនឿចិត្តថាអាចចរចាត្រូវរ៉ូវគ្នាយកខ្សែបម្រើវ័យ ២៣ ឆ្នាំរូបនេះបាន។
ទន្ទឹមនឹងការតាមប្រមាញ់ Anderson, Man City ក៏កំពុងតែប្រជែងគ្នាយ៉ាងក្តៅគគុកជាមួយក្រុមមាន់ខ្នាយមាស Tottenham Hotspur ដើម្បីដណ្តើមយក Sandro Tonali ផងដែរ។ ក្រុម Spurs ក្រោមការដឹកនាំរបស់លោក Roberto De Zerbi ចង់បានអតីតតារាឆ្នើមរបស់ AC Milan រូបនេះទៅធ្វើជាកីឡាករឆ្នើមប្រចាំក្រុម (Marquee signing) ប៉ុន្តែការហក់ចូលរួមប្រជែងពីសំណាក់ Man City បានធ្វើឱ្យស្ថានការណ៍ប្រែប្រួល។ មេឃខៀវចង់បាន Tonali មកដើម្បីធានាសុវត្ថិភាពក្នុងតំបន់បម្រើ ស្របពេលដែលខ្សែបម្រើការពារ Rodri កំពុងឈានចូលដល់ឆ្នាំចុងក្រោយនៃកិច្ចសន្យារបស់ខ្លួន។
ក្រៅពីផែនការទិញកីឡាករដែលរំពឹងថានឹងត្រូវចំណាយសរុបលោតហួសពី ២០០ លានផោន នោះ អ្នកគាំទ្រ Man City ក៏កំពុងតែទន្ទឹងរង់ចាំការប្រកាសតែងតាំងលោក Enzo Maresca ជាគ្រូបង្វឹកថ្មីជាផ្លូវការផងដែរ។ ការចរចារវាង Man City និង Chelsea បានអូសបន្លាយពេលយូរជាងការរំពឹងទុក ប៉ុន្តែវាមិនមានហានិភ័យក្នុងការបរាជ័យឡើយ ហើយរំពឹងថានឹងត្រូវប្រកាសជាផ្លូវការក្នុងរយៈពេលមួយទៅពីរសប្តាហ៍ខាងមុខ ដើម្បីដឹកនាំក្រុមដណ្តើមពានរង្វាន់ Premier League ពីដៃ Arsenal មកវិញ។
