Manchester City ផ្តល់បច្ចុប្បន្នភាពលើករណីចោទប្រកាន់ ១១៥ ករណី ខណៈសាលក្រមកៀកនឹងចេញ
អត្ថបទសរសេរដោយ Bonat • 89 views
ក្លិប Manchester City បានផ្តល់ព័ត៌មានថ្មីអំពីស្ថានភាពនៃករណីចោទប្រកាន់ចំនួន ១១៥ ករណី ពាក់ព័ន្ធនឹងការរំលោភលើច្បាប់ហិរញ្ញវត្ថុ (FFP) ចន្លោះឆ្នាំ ២០០៩ ដល់ ២០១៨ ក្នុងរបាយការណ៍ហិរញ្ញវត្ថុប្រចាំឆ្នាំរបស់ពួកគេ។ ទោះបីជាការស៊ើបអង្កេតបានបញ្ចប់តាំងពីចុងឆ្នាំ ២០២៤ ក៏ដោយ ប៉ុន្តែរហូតមកដល់ពេលនេះ (ខែធ្នូ ២០២៥) លទ្ធផលផ្លូវការនៅមិនទាន់ប្រកាសនៅឡើយ។ អតីតទីប្រឹក្សាហិរញ្ញវត្ថុរបស់ក្លិប លោក Stefan Borson ជឿជាក់ថា សាលក្រមអាចនឹងប្រកាសចេញ មុនថ្ងៃបុណ្យណូអែល នេះ។ ក្នុងរបាយការណ៍ហិរញ្ញវត្ថុ ក្លិបបានបញ្ជាក់ថា គណៈកម្មការឯករាជ្យ កំពុងបន្តពិនិត្យករណីនេះ។ ថ្នាក់ដឹកនាំក្លិបនៅតែមានទំនុកចិត្តខ្ពស់ថា ក្លិបនឹងអាច បន្តប្រតិបត្តិការ និងដោះស្រាយរាល់កាតព្វកិច្ចហិរញ្ញវត្ថុបានជាធម្មតា ទោះមានអ្វីកើតឡើងក៏ដោយ។
ប្រសិនបើរកឃើញថាមានកំហុស Man City អាចប្រឈមនឹងការពិន័យធ្ងន់ធ្ងរដូចជា៖ ដកហូតពានរង្វាន់, ដកពិន្ទុយ៉ាងច្រើន ឬអាចឈានដល់ការ បណ្តេញចេញពីលីគ។ អ្នកជំនាញច្បាប់បានព្រមានថា សាលក្រមដែលចេញមកនឹងមិនមែនជាចំណុចបញ្ចប់ឡើយ។ ភាគីទាំងសងខាង (ក្លិប និង Premier League) ត្រូវបានរំពឹងថានឹង ប្តឹងឧទ្ធរណ៍ ប្រសិនបើលទ្ធផលមិនអំណោយផលដល់ពួកគេ ដែលនឹងធ្វើឱ្យរឿងក្តីនេះអូសបន្លាយពេលយូរបន្ថែមទៀត។
