Kylian Mbappe ចាត់ទុក Lionel Messi និង Cristiano Ronaldo ជាកីឡាករល្អបំផុតនៅ World Cup 2026 ដោយមិនខ្វល់ពីរឿងបំបែកកំណត់ត្រាផ្ទាល់ខ្លួន
អត្ថបទសរសេរដោយ Danny • 38 views
ប្រធានក្រុមជម្រើសជាតិបារាំង Kylian Mbappe បានទាត់ចោលការប្រៀបធៀបរូបគេទៅនឹងកំពូលតារាបាល់ទាត់ដទៃ ដោយបានសង្កត់ធ្ងន់ថា Lionel Messi និង Cristiano Ronaldo នៅតែជាកីឡាករដ៏វិសេសវិសាស និងលេចធ្លោបំផុតនៅក្នុងពិភពបាល់ទាត់។ ទន្ទឹមនឹងនេះ ខ្សែប្រយុទ្ធវ័យ ២៧ ឆ្នាំរូបនេះ ក៏បានច្រានចោលការជជែកវែកញែកអំពីរង្វាន់ផ្ទាល់ខ្លួន ឬការដេញតាមបំបែកកំណត់ត្រាជាអ្នកស៊ុតបញ្ចូលទីច្រើនជាងគេបំផុតក្នុងប្រវត្តិសាស្ត្រ World Cup ផងដែរ ដោយលោកចង់ផ្ដោតអារម្មណ៍ទាំងស្រុងទៅលើការជួយក្រុមមាន់គកបារាំងឱ្យទទួលបានជោគជ័យ។
នៅក្នុងសន្និសីទសារព័ត៌មានមុនជំនួបបន្ទាប់ ខ្សែប្រយុទ្ធរបស់ក្លិប Real Madrid រូបនេះត្រូវបានសួរនាំឱ្យវាយតម្លៃលើកំពូលតារាឆ្នើមៗនៅក្នុងព្រឹត្តិការណ៍ World Cup 2026។ Mbappe បានឆ្លើយតបយ៉ាងច្បាស់ៗទៅកាន់សារព័ត៌មាន Marca ថា៖ «Messi គឺជាកីឡាករដ៏ល្អបំផុត រួមជាមួយ Cristiano ដែរ នោះជារឿងច្បាស់ណាស់។ ខ្ញុំគ្រាន់តែព្យាយាមជួយក្រុមរបស់ខ្ញុំឱ្យឈ្នះពានរង្វាន់ World Cup មួយផ្សេងទៀតតែប៉ុណ្ណោះ រឿងក្រៅពីនេះគឺសម្រាប់តែអ្នកកាសែតជជែកគ្នាលេងទេ។ ពេលនេះខ្ញុំមិនបានគិតដល់ Haaland ទេ ខ្ញុំកំពុងគិតតែពីការប្រកួតទល់នឹងអ៊ីរ៉ាក់ប៉ុណ្ណោះ»។
តារាឆ្នើមរូបនេះក៏បានបន្ថែមទាំងភាពដាក់ខ្លួនជុំវិញរឿងអាយុ និងអនាគតរបស់គេផងដែរថា៖ «ខ្ញុំនឹងមិននៅលេងដល់អាយុ ៤០ ឆ្នាំដូចពួកគាត់ឡើយ ពួកគេច្បាស់ជាដេញខ្ញុំចេញមុនពេលហ្នឹងមិនខាន។ ខ្ញុំមិនបានរៀបចំផែនការវែងឆ្ងាយសម្រាប់អនាគតទេ ខ្ញុំគិតតែពីពេលបច្ចុប្បន្ន និងការរីករាយនៅក្នុង World Cup នេះ»។ នៅពេលត្រូវបានសួរដេញដោលអំពីឱកាសក្នុងការក្លាយជាអ្នកស៊ុតបញ្ចូលទីច្រើនជាងគេក្នុងប្រវត្តិសាស្ត្រ World Cup ជំនួសតំណែង Lionel Messi នោះ Mbappe បានឆ្លើយតបថា៖ «វាជាក្តីរីករាយមួយដែលបានស្ថិតនៅចំណុចនោះ ប៉ុន្តែរឿងសំខាន់គឺការប្រកួតដើម្បីឈ្នះកៅអីឡើងទៅវគ្គបន្ត។ ខ្ញុំដឹងថា Leo នឹងស៊ុតបញ្ចូលទី ព្រោះគាត់តែងតែធ្វើវាបានសម្រេច។ ខ្ញុំស្ថិតនៅពីក្រោយគាត់មែន ប្រសិនបើយើងស៊ុតបាន យើងនឹងខិតទៅក្បែរគាត់ ប៉ុន្តែអ្វីដែលសំខាន់បំផុតសម្រាប់ខ្ញុំ គឺការឈ្នះពានរង្វាន់ World Cup»។
ក្រៅពីនេះ Mbappe ក៏បានលើកឡើងពីការវិវត្តនៃយុទ្ធសាស្ត្របាល់ទាត់សម័យទំនើប ដោយកត់សម្គាល់ថាក្រុមដែលឈ្នះពានរង្វាន់តែងតែជាអ្នកបង្កើតឥទ្ធិពល និងការចម្លងតាមពីក្រុមដទៃ ដូចជាកាលពីមុនគេឱ្យត្រាប់តាមទម្រង់គ្រប់គ្រងបាល់របស់ Barcelona បន្ទាប់មក Real Madrid និងបច្ចុប្បន្នគឺទម្រង់ដេញបង្រ្កាប់ភ្លាមៗ (Counter-pressing) របស់ PSG ជាដើម ប៉ុន្តែលោកបញ្ជាក់ថា បាល់ទាត់កម្រិតជម្រើសជាតិគឺមានលក្ខណៈខុសប្លែក និងដាច់ដោយឡែកទាំងស្រុង។
បច្ចុប្បន្ន ក្រុមជម្រើសជាតិបារាំងកំពុងបង្វែរការផ្ដោតអារម្មណ៍ទៅលើការប្រកួតដ៏សំខាន់ទល់នឹងក្រុមជម្រើសជាតិអ៊ីរ៉ាក់ (Iraq)។ បន្ទាប់ពីបានបើកឆាកយកឈ្នះសេណេហ្គាល់ ៣-១ ដោយមានការរួមចំណែករកគ្រាប់បាល់បាន ២ គ្រាប់ពី Mbappe នោះ មកទល់ពេលនេះ ក្រុមមាន់គកបារាំងកំពុងមានទំនុកចិត្តខ្ពស់ក្នុងការស្វែងរក ៣ ពិន្ទុបន្ថែមទៀតដើម្បីកក់កៅអីឡើងទៅកាន់វគ្គខ្វែងជាផ្លូវការ។
