Kevin De Bruyne ចេញមុខរិះគន់ទម្រង់លេងក្រុមខ្លួនឯងចំៗ ក្រោយបែលហ្ស៊ិកប្រឈមមុខនឹងការធ្លាក់ចេញពី World Cup
អត្ថបទសរសេរដោយ Danny • 35 views
ប្រធានក្រុមជម្រើសជាតិបែលហ្ស៊ិក កីឡាករ Kevin De Bruyne បានចេញមុខព្រមានមិត្តរួមក្រុមខ្លាំងៗ បន្ទាប់ពីក្រុមបិសាចក្រហមលេងមិនបានល្អទាល់តែសោះក្នុងការប្រកួតបើកឆាកពីរប្រកួតដំបូង ដោយរកបានត្រឹមតែលទ្ធផលស្មើជាមួយអ៊ីរ៉ង់ និងអេស៊ីប នៅក្នុងព្រឹត្តិការណ៍ World Cup 2026។
ខ្សែបម្រើវ័យ ៣៤ ឆ្នាំរូបនេះបាននិយាយប្រាប់សារព័ត៌មាន Gazzetta ដោយមិនលាក់លៀមថា៖ «ពួកយើងបានបង្កើតកំហុសឆ្កួតៗជាច្រើន (Silly mistakes) ហើយវាបានបង្កើតសម្ពាធយ៉ាងខ្លាំងមកលើខ្លួនឯង។ ពួកយើងដឹងខ្លួនឯងច្បាស់ថាធ្វើមិនទាន់បានល្អឡើយ ដែលវាបានធ្វើឱ្យប៉ះពាល់ដល់ស្មារតីក្រុម ប៉ុន្តែពេលនេះជាពេលដែលយើងត្រូវតែមានការប្តេជ្ញាចិត្តខ្ពស់ជាងមុន»។
ស្ថានភាពរបស់ក្រុមលោក Rudi Garcia ពេលនេះកំពុងស្ថិតក្នុងភាពចង្អៀតចង្អល់ខ្លាំង ខណៈដែលខ្សែប្រយុទ្ធឆ្នើម Romelu Lukaku ក៏កំពុងធ្លាក់ទម្រង់លេង និងមិនទាន់រកគ្រាប់បាល់បាននៅឡើយ រហូតមានការទាមទារឱ្យដាក់កីឡាករវ័យក្មេង Charles De Ketelaere ចូលលេងក្នុងជម្រើសដំបូងជំនួសវិញ។ ទោះជាយ៉ាងណា De Bruyne បានបញ្ជាក់ថា ពេលនេះមិនមែនជាពេលត្រូវគិតពីរឿងបុគ្គល ឬទំនាក់ទំនងផ្ទាល់ខ្លួនឡើយ អ្វីដែលសំខាន់បំផុតគឺត្រូវរួមចិត្តគ្នាលេងដើម្បីក្រុមទាំងមូល។
ភារកិច្ចចុងក្រោយរបស់បែលហ្ស៊ិកក្នុងពូល G គឺសាមញ្ញបំផុត ពោលគឺពួកគេត្រូវតែឈ្នះក្រុមកំពូលតារាងមកពីទ្វីបអូសេអានី គឺនូវែលសេឡង់ (New Zealand) នៅក្នុងដីកីឡដ្ឋាន BC Place នាទីក្រុងវ៉ានគូស័រ ដើម្បីធានាកៅអីឡើងទៅវគ្គបន្ត និងជៀសវាងការធ្លាក់ដេកដីតាំងពីវគ្គដំបូងដូចកាលពីឆ្នាំ ២០២២។ បញ្ហាមួយទៀតគឺ បែលហ្ស៊ិកត្រូវអវត្តមានខ្សែការពាររបស់ក្លិប Lille គឺ Nathan Ngoy ដោយសារតែជាប់ពិន័យកាតក្រហម។
