Jose Mourinho ក្ដោបអំណាចផ្ដាច់មុខលើទីផ្សារដោះដូរ Real Madrid ជាមួយផែនការនាំចូលកីឡាករជើងចាស់ដើម្បី «ដណ្តើមជើងឯកភ្លាមៗ»

គ្រូបង្វឹកលំដាប់កំពូលលោក Jose Mourinho បានបង្ហាញឥទ្ធិពល និងអំណាចគ្រប់គ្រងយ៉ាងខ្លាំងភ្លាមៗបន្ទាប់ពីវិលត្រឡប់មកកាន់ក្លិបអធិរាជស Real Madrid ដោយលោកទទួលបានសិទ្ធិសម្រេចចិត្តលើទីផ្សារដោះដូរកីឡាករក្នុងកម្រិតមួយដែលកម្រមានគ្រូបង្វឹកណាធ្លាប់ទទួលបាននៅកីឡដ្ឋាន Santiago Bernabeu។ យុទ្ធសាស្ត្ររបស់ក្លិបយក្សអេស្ប៉ាញមួយនេះ បានផ្លាស់ប្តូរយ៉ាងគំហុក ដោយងាកមកផ្តល់អាទិភាពលើការដណ្តើមភាពជោគជ័យភ្លាមៗជាជាងគម្រោងរយៈពេលវែង ដោយផ្តោតលើការទិញយកតារាបាល់ទាត់លំដាប់ពិភពលោក និងមានបទពិសោធន៍ជើងចាស់ ដូចជាការផ្សារភ្ជាប់ចំណាប់អារម្មណ៍លើកីឡាករ Enzo Fernandez និង Ruben Dias ជាដើម។

កាលពីថ្ងៃអង្គារ ទី៩ ខែមិថុនា មុនពេលព្រឹត្តិការណ៍ World Cup 2026 ចាប់ផ្តើម កិច្ចប្រជុំកំពូលមួយនៅសណ្ឋាគារ Hotel Santo Mauro ក្នុងទីក្រុង Madrid រវាងលោក Mourinho, អគ្គនាយកក្លិប Jose Angel Sanchez, ប្រធានអ្នកស្កាត់ស្វែងរកកីឡាករ Juni Calafat និងភ្នាក់ងារកីឡាករល្បីឈ្មោះ Jorge Mendes បានបង្ហាញឱ្យឃើញពីការផ្លាស់ប្តូរអំណាចដាច់ខាតមកលើដៃរបស់គ្រូបង្វឹកសញ្ជាតិព័រទុយហ្កាល់រូបនេះ។ កាលពីមុន សំណើរសុំទិញកីឡាកររបស់លោក Carlo Ancelotti ជារឿយៗតែងតែត្រូវបានថ្នាក់ដឹកនាំមើលរំលង ប៉ុន្តែពេលនេះ "Special One" គឺជាអ្នករៀបចំផែនការទិញដូរដោយផ្ទាល់។ ជាក់ស្តែង កាលពីឆ្នាំ ២០២៥ អាយុជាមធ្យមនៃកីឡាករថ្មីដែល Madrid ទិញចូលគឺត្រឹមតែ ២១ ឆ្នាំប៉ុណ្ណោះ ប៉ុន្តែនារដូវក្តៅនេះ តាមរយៈការនាំចូលកីឡាករ Marc Cucurella, Bernardo Silva, Ibrahima Konate និងការត្រៀមមកដល់របស់ Denzel Dumfries បានធ្វើឱ្យអាយុជាមធ្យមរបស់កីឡាករថ្មីហក់ឡើងដល់ជិត ២៩ ឆ្នាំ ដែលសបញ្ជាក់ថា Mourinho ចង់បានកីឡាករជើងចាស់ដែលធ្លាប់ឆ្លងកាត់សមរភូមិជាច្រើន មកជួយក្រុមដើម្បីឈ្នះពានរង្វាន់ភ្លាមៗ។

រហូតមកដល់ពេលនេះ Real Madrid បានចំណាយលុយ ៥៥ លានអឺរ៉ូ ទិញយកខ្សែការពារ Cucurella ពី Chelsea និងបានចុះកិច្ចសន្យារយៈពេល ២ ឆ្នាំនាំយកខ្សែបម្រើវ័យ ៣១ ឆ្នាំ Bernardo Silva ក្នុងទម្រង់គ្មានតម្លៃខ្លួន (Free Transfer) ពី Manchester City ក្រោយពេល Mourinho ជម្រុញឱ្យក្លិបធ្វើការងារនេះយ៉ាងលឿនបំផុត។ មិនតែប៉ុណ្ណោះ ក្លិបក៏បាននាំយកខ្សែការពារ Konate ក្រោយចប់កិច្ចសន្យាជាមួយ Liverpool និងត្រៀមចំណាយ ២០ លានអឺរ៉ូយក Dumfries ពី Inter Milan មកជំនួស Dani Carvajal ផងដែរ។ ផែនការចំណាយនឹងមិនទាន់បញ្ឈប់ឡើយ ដោយ Real Madrid កំពុងសម្លឹងឃើញ Enzo Fernandez របស់ Chelsea ដែលមានបំណងចង់មកលេងនៅអេស្ប៉ាញ និងខ្សែការពារ Ruben Dias របស់ Manchester City ដើម្បីមកពង្រឹងតំបន់ការពារបន្ថែម។

ទន្ទឹមនឹងការនាំចូល ក្លិបក៏ត្រៀមបញ្ចប់កិច្ចសន្យារបស់ Dani Ceballos មុនកំណត់មួយឆ្នាំផងដែរ។ យ៉ាងណាមិញ សំណួរសំខាន់បំផុតកំពុងធ្លាក់ទៅលើអនាគតរបស់ស៊ុបភើស្តារ Vinicius Junior វ័យ ២៥ ឆ្នាំ ដែលមានកិច្ចសន្យារហូតដល់ឆ្នាំ ២០២៧។ ខ្សែប្រយុទ្ធសញ្ជាតិប្រេស៊ីលរូបនេះចង់បន្តស្នាក់នៅក្លិប ប៉ុន្តែការចរចាត្រូវបានផ្អាករហូតដល់ចប់ World Cup។ Real Madrid កំពុងស្ថិតក្នុងផ្លូវបំបែកដ៏សំខាន់៖ ត្រូវព្រមព្រៀងតាមការទាមទារប្រាក់ខែដ៏ខ្ពស់កប់ពពករបស់គេ ឬត្រូវបង្ខំចិត្តលក់គេចេញក្នុងតម្លៃខ្លួនដ៏មហាសាលនារដូវក្តៅនេះ ដើម្បីជៀសវាងការបាត់បង់គេដោយគ្មានតម្លៃខ្លួននៅពេលអនាគត ហើយសំឡេងរបស់លោក Jose Mourinho នឹងមានទម្ងន់បំផុតក្នុងការសម្រេចចិត្តលើរឿងនេះ។