Gabriel Martinelli បង្ហាញពីវិធីជួយ Gabriel Jesus ឱ្យឆ្លងផុតដំណាក់កាលរបួសដ៏លំបាក
អត្ថបទសរសេរដោយ Bonat • 83 views
ខ្សែប្រយុទ្ធស្លាប Gabriel Martinelli បានបង្ហើបពីតួនាទីយ៉ាងសំខាន់ក្នុងការជួយមិត្តរួមជាតិប្រេស៊ីល Gabriel Jesus ឱ្យមានកម្លាំងចិត្តឡើងវិញ ក្នុងអំឡុងពេលសម្រាកព្យាបាលរបួសជង្គង់ (ACL) ជិត ១ ឆ្នាំ ខណៈដែលបច្ចុប្បន្ន Jesus បានត្រលប់មកជួយ Arsenal វិញហើយ។ Martinelli បានប្រើប្រាស់បទពិសោធន៍ផ្ទាល់ខ្លួនដែលធ្លាប់រងរបួសកាលពីប៉ុន្មានឆ្នាំមុន ដើម្បីផ្តល់ដំបូន្មាន និងចំណាយពេលនៅក្បែរ Jesus ជាប្រចាំ។ លោកយល់ច្បាស់ថាការអវត្តមានពីទីលានយូរគឺជារឿងពិបាកបំផុតសម្រាប់កីឡាករ។ ទោះបីជាមានវ័យខុសគ្នាត្រឹម ៣ ឆ្នាំ ប៉ុន្តែ Martinelli បានទម្លាយថា លោកតែងតែចាត់ទុក Jesus ជាអាទិទេពបាល់ទាត់តាំងពីគេនៅក្មេង និងធ្លាប់តាមដាន Jesus លេងឱ្យក្លិប Palmeiras តាមទូរទស្សន៍តាំងពីខ្លួនមានអាយុ ១២ ឆ្នាំ។
បន្ទាប់ពីសម្រាកព្យាបាល ១១ ខែ Jesus បានចូលលេងជាកីឡាករបម្រុងក្នុងពានរង្វាន់ Champions League ទល់នឹង Club Brugge កាលពីដើមខែនេះ និងបានបង្ហាញខ្លួនជាជម្រើសដំបូងក្នុងពាន Carabao Cup ឈ្នះ Crystal Palace កាលពីថ្ងៃអង្គារ។ គ្រូបង្វឹក Arsenal បានសរសើរថា Jesus មាន "គុណភាពពិសេស" ក្នុងការភ្ជាប់ទំនាក់ទំនងរវាងកីឡាករក្នុងក្រុម និងបង្កភាពមិនច្បាស់លាស់ដល់គូប្រកួត។ លោកពិតជារំភើបដែលឃើញកីឡាកររូបនេះត្រលប់មកវិញជាមួយថាមពល និងស្នាមញញឹម។ ទោះបីជាមានព័ត៌មានផ្សព្វផ្សាយពីការផ្ទេរទៅកាន់ AC Milan ឬអារ៉ាប៊ីសាអូឌីត ក៏ដោយ ប៉ុន្តែ Jesus បានបញ្ជាក់ជំហរច្បាស់លាស់ថា លោកចង់ស្នាក់នៅបន្ត។ Jesus បាននិយាយថា៖ "ខ្ញុំមានការងារដែលមិនទាន់បញ្ចប់នៅ Arsenal។ ខ្ញុំមិនចង់ចាកចេញទេ"។ លោកបញ្ជាក់ថា គោលបំណងធំរបស់លោកគឺការឈ្នះពានរង្វាន់ជាមួយ Arsenal មិនមែនគ្រាន់តែមកដើម្បីស៊ុតបញ្ចូលទីនោះទេ។
