គ្រូបង្វឹក Flamengo លោក Filipe Luis បកស្រាយមតិយោបល់ពាក់ព័ន្ធករណីរើសអើងលើ Vinicius Junior ក្នុងជំនួបរវាង Real Madrid និង Benfica

គ្រូបង្វឹកក្លិប Flamengo លោក Filipe Luis បានចេញមុខបកស្រាយអំពីមតិយោបល់របស់ខ្លួនពាក់ព័ន្ធនឹងកីឡាករ Vinicius Junior ខណៈពេលករណីប្រកាន់ពូជសាសន៍កំពុងបង្កការភ្ញាក់ផ្អើលក្នុងពិភពបាល់ទាត់។

ហេតុការណ៍នេះកើតឡើងក្រោយពីខ្សែប្រយុទ្ធរបស់ Real Madrid បានចោទប្រកាន់កីឡាករ Benfica គឺ Gianluca Prestianni ថាបានប្រើពាក្យប្រកាន់ពូជសាសន៍លើគាត់ អំឡុងការប្រកួត Champions League រវាងក្រុមទាំងពីរ នៅកីឡដ្ឋាន Estadio da Luz។ ករណីនេះបានធ្វើឱ្យមានការតវ៉ា និងការរិះគន់យ៉ាងខ្លាំងពីសាធារណជន និងស្ថាប័នបាល់ទាត់។

បច្ចុប្បន្ន ស្ថាប័ន UEFA បានបើកការស៊ើបអង្កេតជាផ្លូវការលើហេតុការណ៍នេះ ខណៈ Gianluca Prestianni ត្រូវបានផ្អាកជាបណ្តោះអាសន្ន មិនអនុញ្ញាតឱ្យចូលរួមប្រកួតជើងទីពីរនៅកីឡដ្ឋាន Santiago Bernabeu។

លោក Filipe Luis បានបញ្ជាក់ថា មតិយោបល់របស់គាត់មិនមែនមានន័យថាគាំទ្រអំពើប្រកាន់ពូជសាសន៍ឡើយ ប៉ុន្តែគាត់ចង់ឱ្យមានការទទួលខុសត្រូវច្បាស់លាស់ ប្រសិនបើមានកំហុសពិតប្រាកដ។ គាត់ក៏បានបង្ហាញជំហរច្បាស់ថា គាត់ប្រឆាំងដាច់ខាតចំពោះអំពើរើសអើងគ្រប់ប្រភេទ ហើយអំពាវនាវឱ្យពិភពបាល់ទាត់រួមគ្នាប្រយុទ្ធប្រឆាំងនឹងបញ្ហានេះ។

ករណីនេះកំពុងស្ថិតក្រោមការស៊ើបអង្កេតរបស់ UEFA ហើយលទ្ធផលចុងក្រោយនឹងកំណត់ថាតើមានវិធានការណ៍វិន័យបន្ថែម ឬអត់។ ទោះយ៉ាងណា វាបានលើកឡើងវិញពីបញ្ហាប្រកាន់ពូជសាសន៍ ដែលនៅតែជាបញ្ហាធ្ងន់ធ្ងរក្នុងពិភពបាល់ទាត់សម័យទំនើប។