មានការរិះគន់យ៉ាងខ្លាំងថា អង្គការ FIFA កំពុងផ្តោតលើការបង្កើតប្រាក់ចំណូល ជាងការពិចារណាផលប្រយោជន៍ទូទៅរបស់វិស័យបាល់ទាត់

ថ្មីៗនេះ FIFA បានណែនាំប្រភេទសំបុត្រថ្មីដែលមានតម្លៃខ្ពស់ជាងមុន សម្រាប់ការប្រកួត World Cup 2026 ដែលបានបង្កឲ្យអ្នកគាំទ្រជាច្រើនមិនពេញចិត្ត ព្រោះតម្លៃខ្លះខ្ពស់ជាងមុនមិនធ្លាប់មានក្នុងប្រវត្តិសាស្ត្រ។

ឧទាហរណ៍ ប្រភេទសំបុត្រ “ជួរមុខទី១” បានកំណត់តម្លៃសំបុត្រសម្រាប់ការប្រកួតបើកឆាករបស់ USA ជាមួយ Paraguay នៅថ្ងៃទី 12 ខែ​មិថុនា នៅទីក្រុង Englewood ដល់ទៅ $4,105។

មុនការកែប្រែនេះ សំបុត្រ ប្រភេទទី១ មិនដែលលើសពី $2,735 ឡើយ។

ក្រៅពីនេះ ក៏មានប្រភេទសំបុត្រថ្មីមួយទៀតឈ្មោះ “ជួរមុខទី២” ដែលមានតម្លៃចន្លោះពី $1,940–$2,330 សម្រាប់ការប្រកួតដូចគ្នា នេះបើយោងតាមសារព័ត៌មាន The Athletic។

ការកើនឡើងនៃតម្លៃ និងចំនួនប្រភេទសំបុត្រ បង្ហាញពីយុទ្ធសាស្ត្ររបស់ FIFA ក្នុងការបង្កើនប្រាក់ចំណូល ពីការប្រកួតដែលបានពង្រីកទៅជាក្រុមចំនួន 48។

ការប្រកួត World Cup 2026 នឹងប្រព្រឹត្តទៅចាប់ពី ថ្ងៃទី 11 ខែមិថុនា ដល់ថ្ងៃទី 19 ខែកក្កដា នៅទីក្រុងម្ចាស់ផ្ទះចំនួន 16 នៅក្នុង សហរដ្ឋអាមេរិក, ម៉ិកស៊ីកូ និង កាណាដា ហើយជាលើកដំបូងដែលមានក្រុមចំនួន 48 និងការប្រកួតសរុប 104។

យោងតាមឯកសារ “Ticket Products and Categories” ចេញថ្ងៃទី 9 ខែកញ្ញា សំបុត្រ ប្រភេទទី 1 គឺមានតម្លៃខ្ពស់បំផុត និងស្ថិតនៅតំបន់ជាន់ក្រោម ខណៈ ប្រភេទទី 2 គ្របដណ្តប់កន្លែងអង្គុយនៅជាន់ក្រោម និងជាន់លើ។

ការបន្ថែមប្រភេទ “ជួរមុខ” ថ្មីៗនេះ បង្ហាញថា FIFA បានបម្រុងកន្លែង VIP បន្ថែម ដែលធ្វើឲ្យមានការសង្ស័យអំពីរចនាសម្ព័ន្ធតម្លៃថ្មី។

រហូតមកដល់ពេលនេះ FIFA មិនទាន់បានចេញមតិយោបល់ជាផ្លូវការនៅឡើយទេ ទោះបីមានការសាកសួរពីសារព័ត៌មានក៏ដោយ។

តម្លៃសំបុត្រកើនឡើងខ្លាំង សម្រាប់ការប្រកួតសំខាន់ៗ

តម្លៃកើនឡើងមិនត្រឹមតែការប្រកួតបើកឆាកទេ ប៉ុន្តែប៉ះពាល់ដល់ការប្រកួតផ្សេងៗផងដែរ។ ឧទាហរណ៍ សំបុត្រថ្មីមានតម្លៃ $3,360 សម្រាប់ការប្រកួត Canada vs Bosnia and Herzegovina នៅថ្ងៃទី ថ្ងៃទី 12 ខែមិថុនា នៅទីក្រុង Toronto ខណៈសំបុត្រវគ្គ Round of 16 នៅ Philadelphia មានតម្លៃប្រហែល $905។

សម្រាប់វគ្គផ្តាច់ព្រ័ត្រ នៅ MetLife Stadium ថ្ងៃទី 19 July សំបុត្រថ្នាក់ខ្ពស់បានកើនពី $8,680 ទៅដល់ $10,990។ សំបុត្រ ប្រភេទទី2 កើនទៅ $7,380 (ពី $5,575) ខណៈ ប្រភេទទី3 កើនទៅ $5,785 (ពី $4,185)។

គេហទំព័រផ្លូវការរបស់ FIFA បានបញ្ជាក់ថា សំបុត្រសម្រាប់វគ្គផ្តាច់ព្រ័ត្រ ត្រូវបានលក់អស់ទាំងស្រុងតាំងពីសប្តាហ៍មុន។

ការរិះគន់ពីអ្នកគាំទ្រ និងការឆ្លើយតបពី FIFA

ការកើនឡើងតម្លៃនេះ បានបង្កការរិះគន់យ៉ាងខ្លាំងពីអ្នកគាំទ្រ ជាពិសេសបន្ទាប់ពីមានបញ្ហាបច្ចេកទេសក្នុងការលក់សំបុត្រវិញកាលពីសប្តាហ៍មុន។

ប្រធាន FIFA លោក Gianni Infantino បានព្យាករថា សំបុត្រនឹងលក់អស់ទាំងអស់ ដោយសារការគាំទ្រខ្លាំងពីអ្នកគាំទ្រទូទាំងពិភពលោក។

ដើម្បីបន្ថយសម្ពាធការរិះគន់ FIFA ក៏បានណែនាំប្រភេទសំបុត្រ “Fan Zone” ដែលមានតម្លៃសមរម្យជាងមុន កាលពីខែ ធ្នូ ប៉ុន្តែតម្លៃសំបុត្រសរុបនៅតែខ្ពស់បំផុតក្នុងប្រវត្តិសាស្ត្រ World Cup។