FC Barcelona បានចូល Top 8 នៅ Champions League ខណៈបន្ទាត់ប្រយុទ្ធក្រោមការដឹកនាំរបស់ Hansi Flick កំពុងក្លាយជាអាវុធគួរឱ្យខ្លាច
អត្ថបទសរសេរដោយ Dany • 91 views
ដំណឹងល្អបានមកដល់សម្រាប់អ្នកគាំទ្រ Barcelona បន្ទាប់ពីបញ្ចប់វគ្គ League Phase នៃ Champions League ដោយក្រុមបានបញ្ចប់ក្នុង Top 8 ហើយបន្ទាត់ប្រយុទ្ធសំខាន់របស់ក្រុម ក៏ចាប់ផ្តើមបង្ហាញភាពគួរឱ្យខ្លាចម្តងទៀត ក្រោមការដឹកនាំរបស់ Hansi Flick។
ក្នុងការប្រកួតទល់នឹង FC Copenhagen នៅ Camp Nou ក្រុម Blaugrana មានការលំបាកនៅដើមការប្រកួត ប៉ុន្តែបានរកដំណោះស្រាយ តាមរយៈបន្ទាត់ប្រយុទ្ធសំខាន់ ដែលរួមមាន Robert Lewandowski, Lamine Yamal និង Raphinha ដែលមើលទៅ កំពុងចាប់ផ្តើមសម្របសម្រួលគ្នាបានល្អ នៅពេលសំខាន់បំផុតនៃរដូវកាល។
បីនាក់នេះ សុទ្ធតែរកគ្រាប់បាល់បាន ក្នុងជ័យជម្នះ 4-1 ដែលបង្ហាញថា ការជឿជាក់របស់ Flick មិនខុសឡើយ។ Lewandowski ជាអ្នករកបានបាល់ប៉េណាល់ទី ដែល Raphinha ស៊ុតបញ្ចូលទី ខណៈ Yamal មិនត្រឹមតែរកគ្រាប់បានទេ ប៉ុន្តែថែមទាំង assist មួយ និងត្រូវបានជ្រើសជា Man of the Match ផងដែរ។
ក្រោយការប្រកួត Yamal បាននិយាយថា គាត់មានអារម្មណ៍រីករាយជាងមុន នៅក្នុងការប្រកួត Champions League ហើយពេញចិត្តយ៉ាងខ្លាំងចំពោះការបង្ហាញទម្រង់លេងរបស់ខ្លួន។
ក្រៅពីបីនាក់នេះ ក្រុមក៏មានអាវុធប្រយុទ្ធបន្ថែម ដោយ Marcus Rashford បន្តបង្ហាញសារៈសំខាន់។ ខ្សែប្រយុទ្ធអង់គ្លេសរូបនេះ បានស៊ុតគ្រាប់បាល់ម្តងទៀត បន្ទាប់ពីចូលលេងជំនួស ហើយបច្ចុប្បន្ន គាត់ជាអ្នករកគ្រាប់ច្រើនជាងគេរបស់ក្រុម ក្នុង Champions League ជាមួយ 5 គ្រាប់។
ជាមួយជម្រើសប្រយុទ្ធជាច្រើន កំពុងបង្ហាញទម្រង់លេងល្អ Barcelona មើលទៅកាន់តែគួរឱ្យខ្លាច ខណៈពួកគេកំពុងចូលទៅកាន់វគ្គ knockout នៃ Champions League ជាមួយទំនុកចិត្ត និងគុណភាពកាន់តែខ្ពស់។
