ថ្ងៃតែមួយ កំណត់ត្រាពីរ ត្រូវបានបំបែកដោយកំពូលខ្សែប្រយុទ្ធ Erling Haaland និង Kylian Mbappé លើ Cristiano Ronaldo
អត្ថបទសរសេរដោយ Dany • 90 views
ពិភពបាល់ទាត់បានឃើញព្រឹត្តិការណ៍ដ៏អស្ចារ្យមួយ នៅក្នុងថ្ងៃតែមួយ ខណៈដែលកំណត់ត្រាដ៏ធំធេងពីររបស់វីរបុរស Cristiano Ronaldo ត្រូវបានវ៉ាដាច់ និងតាមស្មើដោយកីឡាករជំនាន់ថ្មី។
នៅក្នុងក្របខ័ណ្ឌ Premier League ខ្សែប្រយុទ្ធ Manchester City កីឡាករ Erling Haaland បានបំបែកកំណត់ត្រាចំនួនគ្រាប់ស៊ុតបញ្ចូលទីរបស់ Cristiano Ronaldo ដោយសម្រេចបាន 104 គ្រាប់ លើស Ronaldo ដែលមាន 103 គ្រាប់។ សមិទ្ធផលនេះ បានបញ្ជាក់ពីប្រសិទ្ធភាពដ៏ខ្ពស់ និងភាពគ្រោះថ្នាក់របស់ Haaland ក្នុងលីគកំពូលអង់គ្លេស ចាប់តាំងពីការចូលរួមរបស់គេ។
ជាមួយគ្នានេះផងដែរ នៅក្លិបយក្សអេស្ប៉ាញ Real Madrid ខ្សែប្រយុទ្ធ សញ្ជាតិជាតិបារាំង Kylian Mbappé ក៏បានសរសេរប្រវត្តិសាស្ត្រថ្មី ដោយតាមស្មើកំណត់ត្រារបស់ Cristiano Ronaldo សម្រាប់ការស៊ុតបញ្ចូលទីច្រើនបំផុតក្នុងមួយឆ្នាំប្រតិទិនជាមួយក្លិប គឺចំនួន 59 គ្រាប់។
Mbappé នៅតែមានឱកាសបន្តបំប៉ោងសំណាញ់ទី និងវ៉ាដាច់កំណត់ត្រានេះ ខណៈដែលរដូវកាលមិនទាន់បញ្ចប់ និងខ្សែប្រយុទ្ធវ័យក្មេងរូបនេះ កំពុងបង្ហាញភាពស្រេកឃ្លានខ្លាំងក្នុងការរកគ្រាប់បាល់។
ថ្ងៃនេះ ត្រូវបានគេចាត់ទុកថា ជាថ្ងៃដ៏ពិសេសមួយក្នុងប្រវត្តិសាស្ត្របាល់ទាត់ទំនើប ដែលបង្ហាញពីការផ្លាស់ប្តូរពីយុគសម័យមួយ ទៅកាន់យុគសម័យថ្មី ខណៈកំណត់ត្រារបស់រូបតំណាងដូច Cristiano Ronaldo កំពុងត្រូវបានជំនួសដោយកីឡាករជំនាន់ក្រោយដែលមានសមត្ថភាពលេចធ្លោមិនចាញ់គ្នា។
