Endrick បង្ហាញអារម្មណ៍ ‘ចង់បន្តស្នាក់នៅ Lyon’ បន្ទាប់ពីរកបានគ្រាប់បាល់សំខាន់ជួយក្រុមឈ្នះ Rennes

ខ្សែប្រយុទ្ធវ័យក្មេង Endrick ដែលកំពុងលេងឲ្យ Lyon ក្នុងលក្ខខណ្ឌខ្ចីជើងពី Real Madrid បន្តបង្ហាញទម្រង់លេងគួរឲ្យចាប់អារម្មណ៍ ដោយរកបានគ្រាប់បាល់ក្នុងជ័យជម្នះ 4-2 លើ Rennes នៅលីគ Ligue 1។

គ្រាប់បាល់នេះគឺជាគ្រាប់ទីប្រាំរបស់គាត់ក្នុងលីគរដូវកាលនេះ ហើយបានជួយឲ្យក្រុមរបស់ Paulo Fonseca បន្តការប្រជែងយ៉ាងខ្លាំងក្នុងការដណ្តើមកៅអី Champions League។ ជ័យជម្នះនេះបានធ្វើឲ្យ Lyon ឡើងទៅលេខ 3 ក្នុងតារាង ដោយនៅពីមុខ Lille ចំនួន 2 ពិន្ទុ ខណៈនៅសល់តែ 2 ប្រកួតទៀតប៉ុណ្ណោះ។

បន្ទាប់ពីការប្រកួត Endrick បាននិយាយអំពីអនាគតរបស់ខ្លួន ដោយបង្ហាញថាគាត់កំពុងមានអារម្មណ៍ល្អ និងសប្បាយចិត្តនៅប្រទេសបារាំង ហើយបើកទ្វារសម្រាប់ការបន្តស្នាក់នៅបន្ថែម។

គាត់បាននិយាយថា៖ “អនាគតរបស់ខ្ញុំ? ខ្ញុំមានអារម្មណ៍ល្អ និងសប្បាយចិត្តនៅទីនេះ។ ខ្ញុំស្រឡាញ់មិត្តរួមក្រុមរបស់ខ្ញុំ ហើយអ្វីផ្សេងទៀត ខ្ញុំទុកឲ្យព្រះជាម្ចាស់ជាអ្នកសម្រេច។ បើត្រូវត្រឡប់ទៅ Real Madrid ខ្ញុំនឹងត្រឡប់ទៅវិញ បើត្រូវបន្តនៅទីនេះ វាក៏អាចកើតឡើងដែរ។ ខ្ញុំចង់ស្នាក់នៅទីនេះ ព្រោះគ្រប់គ្នាធ្វើឲ្យខ្ញុំមានអារម្មណ៍ស្រួលចិត្ត”។

ចាប់តាំងពីមកដល់ Lyon ក្នុងទីផ្សាររដូវរងា Endrick បានជួយផ្លាស់ប្តូរស្ថានភាពក្រុមយ៉ាងខ្លាំង ពីក្រុមដែលនៅកណ្ដាលតារាង ទៅក្លាយជាក្រុមប្រជែងកៅអីអឺរ៉ុប។

គាត់បន្ថែមអំពីការប្រកួតទល់ Rennes ថា៖ “ខ្ញុំមានអារម្មណ៍ល្អណាស់ វាជាប្រកួតសំខាន់សម្រាប់យើង។ យើងការពារបានល្អ មានវិន័យ និងមានគុណភាពវាយសម្រុកខ្លាំង។ ខ្ញុំតែងតែព្យាយាមជួយក្រុម ទាំងការរកគ្រាប់បាល់ និងការខិតខំប្រឹងប្រែង។ ថ្ងៃនេះខ្ញុំរកបានគ្រាប់ ហើយខ្ញុំសប្បាយចិត្តខ្លាំង”។