Endrick សារភាពថាគាត់ភ្ញាក់ផ្អើលចំពោះបុគ្គលិកលក្ខណៈរបស់ Jude Bellingham បន្ទាប់ពីចូលរួមជាមួយ Real Madrid

Endrick បានបើកចំហអំពីការលំបាកដំបូងរបស់គាត់នៅ Real Madrid និងចំណងមិត្តភាពដែលមិនបានរំពឹងទុកជាមួយ Jude Bellingham ដែលបានជួយឲ្យគាត់ឆ្លងកាត់ពេលវេលាពិបាកនៅអេស្ប៉ាញ។ ខ្សែប្រយុទ្ធវ័យក្មេងប្រេស៊ីល ដែលកំពុងរកទម្រង់លេងល្អឡើងវិញនៅ Lyon បានសារភាពថា កីឡាករអង់គ្លេសរូបនេះខុសពីអ្វីដែលគាត់ធ្លាប់គិតមុនចូលមក Real Madrid យ៉ាងខ្លាំង។

ក្នុងបទសម្ភាសន៍ជាមួយ The Guardian, Endrick បាននិយាយថា៖ "Bellingham មានសារៈសំខាន់ខ្លាំងសម្រាប់ខ្ញុំ។ គាត់ធ្វើឲ្យខ្ញុំមានអារម្មណ៍ថាជាផ្នែកមួយនៃក្លិប Real Madrid។ ខ្ញុំមិនសូវចេះអង់គ្លេសទេ ប៉ុន្តែគាត់ព្យាយាមនិយាយជាមួយខ្ញុំ សូម្បីតែភាសាអេស្ប៉ាញ ក៏ព្យាយាមនិយាយផងដែរ។ គាត់នៅក្បែរខ្ញុំ និងផ្តល់ដំបូន្មាន។ មិត្តភាពរបស់គាត់មានឥទ្ធិពលខ្លាំងលើការចាប់ផ្តើមរបស់ខ្ញុំនៅ Real Madrid។ ខ្ញុំធ្លាប់មានការគិតខុសអំពីគាត់មុនមកទីនេះ ប៉ុន្តែគាត់ខុសពីអ្វីដែលខ្ញុំគិតទាំងស្រុង ហើយគាត់ជាកីឡាករអស្ចារ្យ និងជាមនុស្សល្អណាស់"។

ខណៈ Bellingham ជួយផ្នែកផ្ទាល់ខ្លួនរបស់រូបគេ ហើយ Luka Modric ក៏បានបន្សល់ទុកចំណាប់អារម្មណ៍ធំមួយលើ Endrick ផងដែរ តាមរយៈវិន័យ និងការហ្វឹកហាត់។ គាត់បាននិយាយថា Modric គឺជាគំរូកីឡាករដែលគាត់មិនអាចភ្លេចបាន។

Endrick បន្ថែមថា៖ "Modric គឺជាកីឡាករដែលធ្វើឲ្យខ្ញុំភ្ញាក់ផ្អើលខ្លាំងបំផុតនៅ Real Madrid។ គាត់អាយុ 40 ឆ្នាំហើយ ប៉ុន្តែគាត់នៅតែខ្លាំងណាស់។ គាត់ហ្វឹកហាត់រៀងរាល់ថ្ងៃ ទោះបីមិនបានលេងក៏ដោយ។ វាជាមេរៀនបាល់ទាត់ពិតៗ។ គាត់តែងតែផ្តល់ដំបូន្មានឲ្យខ្ញុំជានិច្ច"

យ៉ាងណាមិញ ដំណើររបស់កីឡាករវ័យក្មេងនេះមិនមែនងាយស្រួលឡើយ ដោយគាត់ធ្លាប់រងរបួសភ្លៅធ្ងន់ និងខកខានការប្រកួតជាច្រើនខែ។ សម្ពាធ និងការភ័យខ្លាចអំពីអនាគតក៏បានធ្វើឲ្យគាត់ជួបការលំបាកផ្លូវចិត្តផងដែរ មុននឹងត្រូវចាកចេញទៅ Lyon ដើម្បីរកតួនាទីលេងឡើងវិញ។