Endrick ទម្លាយរឿងរ៉ាវពិតនៃទំនាក់ទំនងជាមួយលោក Carlo Ancelotti ក្រោយត្រូវអង្គុយកៅអីបម្រុងនៅ World Cup 2026
អត្ថបទសរសេរដោយ Danny • 41 views
ខ្សែប្រយុទ្ធវ័យក្មេងអច្ឆរិយៈរបស់ក្លិប Real Madrid កីឡាករ Endrick បានចេញមុខមកបកស្រាយជុំវិញពាក្យចចាមអារ៉ាម និងការវែកញែកយ៉ាងក្តៅគគុកនៅលើបណ្តាញសង្គម អំពីទំនាក់ទំនងរវាងរូបគេ និងគ្រូបង្វឹកលោក Carlo Ancelotti។ ការចេញមុខមកបញ្ជាក់នេះ ធ្វើឡើងបន្ទាប់ពីមានការបង្ហោះរូបភាពកំប្លែងៗ (Memes) ព្រោងព្រាតនៅលើបណ្តាញសង្គម X (Twitter) ដោយអ្នកគាំទ្របានលេងសើចថា គ្រូបង្វឹកសញ្ជាតិអ៊ីតាលីរូបនេះប្រហែលជា «ស្អប់» ខ្សែប្រយុទ្ធវ័យក្មេងរូបនេះ ទើបបានជាទុកគេឱ្យអង្គុយលើកៅអីបម្រុងពេញមួយប្រកួត ក្នុងជំនួបដែលប្រេស៊ីលស្មើម៉ារ៉ុក ១-១ យ៉ាងខកចិត្ត។
ទោះជាយ៉ាងណា នៅក្នុងជំនួបទីពីរដែលប្រេស៊ីលយកឈ្នះហៃទី ៣-០ នៅទីក្រុង Philadelphia, ខ្សែប្រយុទ្ធវ័យ ១៩ ឆ្នាំរូបនេះ (ដែលធ្លាប់ត្រូវលែងឱ្យក្លិប Lyon ខ្ចីជើងកាលពីរដូវកាលមុន) ត្រូវបានប្តូរចូលលេងនៅនាទី៦៣ ជំនួស Matheus Cunha ក្រោមសំឡេងទះដៃគាំទ្រយ៉ាងខ្លាំងពីអ្នកទស្សនា។ នៅក្នុងការប្រកួតនោះ គេថែមទាំងស៊ុតបញ្ចូលទីបានមួយគ្រាប់ដែរ ប៉ុន្តែត្រូវអាជ្ញាកណ្តាលបដិសេធវិញដោយសារតែជំហរក្រៅល្បែង (Offside)។
ក្រោយបញ្ចប់ការប្រកួត Endrick បានទាត់ចោលរាល់ពាក្យចចាមអារ៉ាមរឿងមានជម្លោះជាមួយគ្រូបង្វឹក ដោយបានថ្លែងការពារលោក Ancelotti ថា៖ «ខ្ញុំបានចំណាយពេលមួយឆ្នាំជាមួយគាត់នៅ Real Madrid... ទោះបីជាបានលេងត្រឹម ៥ នាទី, ១០ នាទី ឬ ១៥ នាទីក៏ដោយ ក៏គាត់ដឹងច្បាស់ថាខ្ញុំត្រូវធ្វើអ្វីនៅពេលចូលលេង គឺខ្ញុំលះបង់គ្រប់យ៉ាងដើម្បីក្រុម ហើយនៅក្រុមជម្រើសជាតិក៏មិនខុសគ្នាដែរ»។ គេបានបន្ថែមទៀតថា៖ «គាត់គឺជាគ្រូបង្វឹកដ៏អស្ចារ្យម្នាក់។ គាត់នឹងមិនធ្វើអ្វីដែលល្អបំផុតសម្រាប់តែ Endrick ឬល្អបំផុតសម្រាប់តែអ្នកគាំទ្រនោះទេ ប៉ុន្តែគាត់នឹងធ្វើអ្វីដែលល្អបំផុតសម្រាប់ក្រុមទាំងមូល»។
ចំណែកឯលោក Carlo Ancelotti ក៏បានបង្ហាញជំហររឹងមាំក្នុងការគ្រប់គ្រង និងអភិវឌ្ឍសមត្ថភាពរបស់កីឡាករវ័យក្មេងរូបនេះ ដោយលោកបានប្រកាសសុំឱ្យអ្នកគាំទ្រមានចិត្តអត់ធ្មត់៖ «ខ្ញុំនឹងដាក់ Endrick ឱ្យចូលលេងនៅពេលវេលាដ៏សមស្របណាមួយ។ យើងត្រូវរង់ចាំបន្តិចទៀត គេនឹងក្លាយជាមនុស្សសំខាន់នៅក្នុងព្រឹត្តិការណ៍ World Cup លើកនេះ... សម្រាប់ខ្ញុំផ្ទាល់ Endrick គឺជាទេពកោសល្យដ៏វិសេសវិសាលបំផុត។ គេមានភាពអត់ធ្មត់ មិនចេះប្រញាប់ប្រញាល់ និងមានភាពចាស់ទុំខ្លាំងណាស់បើធៀបនឹងអាយុរបស់គេ»។
