មកស្គាល់អ្នកគាំទ្រពិសេសរបស់កុងហ្គោ (DR Congo) ដែលកំពុងអង្រួនបេះដូងអ្នកទស្សនា World Cup 2026
អត្ថបទសរសេរដោយ Danny • 37 views
នៅក្នុងការប្រកួតរវាងក្រុមជម្រើសជាតិកុងហ្គោ (DR Congo) ជាមួយកូឡុំប៊ី (Colombia) នាទីក្រុង Guadalajara កាលពីថ្ងៃអង្គារកន្លងទៅ ទិដ្ឋភាពនៅលើកៅអីទស្សនាបានធ្វើឱ្យមានការចាប់អារម្មណ៍យ៉ាងខ្លាំង តាមរយៈវត្តមានរបស់បុរសម្នាក់ឈ្មោះ Michel Kuka Mboladinga ដែលជាអ្នកគាំទ្រដ៏ល្បីល្បាញម្នាក់។
លោក Mboladinga ដែលទទួលបានរហស្សនាមថា «Lumumba Vea» បានរៀបចំខ្លួនយ៉ាងប្លែកគេ ដោយស្លៀកពាក់អាវធំ និងចងក្រវាត់ក ឱ្យដូចទៅនឹងលោក Patrice Lumumba ដែលជានាយករដ្ឋមន្ត្រីដំបូងបង្អស់របស់ប្រទេសកុងហ្គោ (ត្រូវបានធ្វើឃាតកាលពីឆ្នាំ ១៩៦១)។ អ្វីដែលធ្វើឱ្យគ្រប់គ្នាចាប់អារម្មណ៍ខ្លាំង គឺលោកបានឈរស្ងៀមធឹងមិនកម្រើកខ្លួនឡើយ រួចលើកដៃធ្វើកាយវិការត្រាប់តាមរូបចម្លាក់របស់លោក Lumumba ដែលស្ថិតនៅទីក្រុងគីនសាសា ខណៈដែលអ្នកគាំទ្រដទៃទៀតកំពុងស្រែកច្រៀង និងលោតសប្បាយយ៉ាងខ្លាំង។
តាមពិតទៅ លោក Mboladinga បានខកខានការប្រកួតបើកឆាកដំបូងរបស់កុងហ្គោ (ដែលស្មើជាមួយព័រទុយហ្គាល់) ដោយសារតែការធ្វើដំណើររបស់លោកត្រូវពន្យារពេល ព្រោះតែការរឹតបន្តឹងលើអ្នកដំណើរមកពីប្រទេសកុងហ្គោ ជុំវិញបញ្ហានៃការផ្ទុះឡើងនៃវីរុសអេបូឡា (Ebola) នៅក្នុងប្រទេស។
វត្តមានដ៏ប្លែកភ្នែករបស់លោកនៅក្នុងកីឡដ្ឋាន បានធ្វើឱ្យអ្នកគាំទ្រខាងភាគី Colombia ជាច្រើនចូលមកសុំថតរូបជុំគ្នាទុកជាអនុស្សាវរីយ៍យ៉ាងសប្បាយរីករាយ និងបានបង្កើតបរិយាកាសមិត្តភាពយ៉ាងស្រស់ស្អាតនៅក្នុងព្រឹត្តិការណ៍ World Cup 2026 នេះ។
