Dani Alves ត្រៀមទិញក្លិបនៅព័រទុយហ្គាល់ និងចុះឈ្មោះចូលលេងវិញក្នុងវ័យ ៤២ ឆ្នាំ
អត្ថបទសរសេរដោយ Bonat • 89 views
អតីតខ្សែការពារឆ្នើមរបស់ Barcelona កីឡាករ Dani Alves ត្រូវបានរាយការណ៍ថាបានសម្រេចកិច្ចព្រមព្រៀងទិញយកក្លិបបាល់ទាត់មួយនៅប្រទេសព័រទុយហ្គាល់ និងគ្រោងវិលត្រលប់មកកាន់ទីលានវិញក្នុងនាមជាកីឡាករ បន្ទាប់ពីត្រូវបានតុលាការសម្រេចឱ្យមានសេរីភាពកាលពីដើមឆ្នាំ ២០២៥។ Alves ជិតនឹងបញ្ចប់ការទិញយកក្លិប Sporting Clube de Sao Joao de Ver ដែលជាក្លិបនៅលីគលំដាប់ទី ៣ របស់ព័រទុយហ្គាល់ ដោយមានការគាំទ្រពីក្រុមអ្នកវិនិយោគជនជាតិប្រេស៊ីល។ ក្រៅពីធ្វើជាម្ចាស់ក្លិប Alves គ្រោងនឹងចុះហត្ថលេខាលើកិច្ចសន្យារយៈពេល ៦ ខែ ដើម្បីចូលលេងឱ្យក្រុមនេះតែម្តង។ គេជឿជាក់ថាត្រូវការពេលត្រឹមតែ ៣០ ថ្ងៃប៉ុណ្ណោះក្នុងការហ្វឹកហាត់ពង្រឹងកាយសម្បទាឱ្យទាន់ការប្រកួត។ គេមិនបានចូលលេងការប្រកួតផ្លូវការណាមួយឡើយចាប់តាំងពីខែមករា ឆ្នាំ ២០២៣ មក។
កាលពីខែមីនា ឆ្នាំ ២០២៥ តុលាការជាន់ខ្ពស់នៅតំបន់ Catalunya បានសម្រេចឱ្យ Alves រួចផុតពីបទចោទប្រកាន់ រឿងបៀតបៀនផ្លូវភេទ ដោយសារកង្វះភស្តុតាង និងមានភាពមិនស៊ីសង្វាក់គ្នានៃចម្លើយរបស់ដើមបណ្តឹង។ រាល់ការរឹតត្បិតផ្លូវច្បាប់ទាំងអស់ត្រូវបានដកចេញ ដែលអនុញ្ញាតឱ្យគេអាចបន្តអាជីពក្នុងពិភពបាល់ទាត់ឡើងវិញបាន ទាំងក្នុងនាមជាភ្នាក់ងារកីឡាករ គ្រូបង្វឹក ឬម្ចាស់ក្លិប។ ការទិញក្លិបនៅព័រទុយហ្គាល់នេះ ធ្វើឡើងបន្ទាប់ពីតារាឆ្នើម Vinicius Junior របស់ Real Madrid ក៏បានវិនិយោគទិញក្លិប Alverca នៅព័រទុយហ្គាល់កាលពីដើមឆ្នាំ និងទទួលបានជោគជ័យក្នុងការជួយក្រុមឱ្យឡើងមកលេងនៅលីគកំពូលផងដែរ។ បន្ទាប់ពីឆ្លងកាត់ជីវិតក្នុងពន្ធនាគារ និងរឿងក្តីដ៏ចម្រូងចម្រាស Dani Alves កំពុងប្រើប្រាស់បទពិសោធន៍ និងទ្រព្យសម្បត្តិរបស់គេដើម្បីសាងអាណាចក្របាល់ទាត់ថ្មីនៅអឺរ៉ុប ក្នុងនាមជាទាំងម្ចាស់ក្លិប និងកីឡាករ។
