កូនប្រុស Cristiano Ronaldo កំពុងហាត់ជាមួយ Real Madrid U-16 មានឱកាសចូលអាគាដេមី La Fabrica

កូនប្រុសច្បងរបស់តារាបាល់ទាត់ល្បីល្បាញ Cristiano Ronaldo កំពុងទាក់ទាញការចាប់អារម្មណ៍យ៉ាងខ្លាំង បន្ទាប់ពីមានព័ត៌មានថា គាត់កំពុងហាត់ជាមួយក្រុមយុវជន Real Madrid U-16 ដោយមានគោលបំណងចូលរួមអាគាដេមី La Fabrica នៅពេលខាងមុខ។

យោងតាមរបាយការណ៍ពី The Athletic បានឲ្យដឹងថា Ronaldo Jr. អាយុ ១៥ឆ្នាំ ដែលលេងក្នុងតួនាទីខ្សែប្រយុទ្ធ កំពុងចូលរួមហាត់ជាមួយក្រុមយុវជនរបស់ Real Madrid ហើយអាចនឹងមានការផ្លាស់ប្តូរទៅកាន់អាគាដេមីរបស់ក្លឹបក្នុងពេលឆាប់ៗនេះ។ បច្ចុប្បន្ន គាត់ជាកីឡាករនៅអាគាដេមី Al Nassr បន្ទាប់ពីឪពុករបស់គាត់បានផ្លាស់ទៅលេងនៅទីនោះនៅឆ្នាំ 2022។

មុននេះ Ronaldo Jr. ក៏ធ្លាប់ហាត់ និងលេងនៅកម្រិតយុវជនរបស់ Juventus និង Manchester United ដែលជាក្លឹបចាស់របស់ Cristiano Ronaldo ផងដែរ។ ការធ្វើដំណើរនៅកម្រិតយុវជននេះ បង្ហាញថាគាត់កំពុងដើរតាមជំហានអាជីពរបស់ឪពុក។

នៅកម្រិតជម្រើសជាតិ Ronaldo Jr. កើតនៅសហរដ្ឋអាមេរិក ប៉ុន្តែបានទទួលការហៅចូលក្រុមយុវជន Portugal U-15 ជាលើកដំបូងនៅឆ្នាំ 2025 ហើយបានបង្ហាញខ្លួនប្រកួតជាមួយ Japan ក្នុងព្រឹត្តិការណ៍ Vlatko Markovic International Tournament។ បន្ទាប់មក គាត់ក៏បានឡើងទៅលេងនៅកម្រិត U-17 ផងដែរ។

បច្ចុប្បន្ន ការហាត់ជាមួយ Real Madrid U-16 អាចជាជំហានដ៏សំខាន់មួយក្នុងអាជីពរបស់គាត់។ ប្រសិនបើគាត់ចុះហត្ថលេខាជាមួយ La Fabrica នោះគាត់នឹងត្រូវទទួលសំពាធខ្ពស់ ព្រោះឪពុករបស់គាត់ Cristiano Ronaldo គឺជាវីរបុរសដ៏អស្ចារ្យម្នាក់នៅក្លឹបនេះ។

ក្នុងអំឡុងពេល ៩ឆ្នាំនៅ Real Madrid ចាប់ពីឆ្នាំ 2009 ដល់ 2018 Cristiano Ronaldo បានឈ្នះពានធំៗជាច្រើន រួមមាន La Liga, Copa del Rey និង UEFA Champions League ៤ដង។ គាត់ក៏ជាអ្នករកគ្រាប់បាល់ច្រើនបំផុតក្នុងប្រវត្តិសាស្ត្រក្លឹប ដោយមាន 450 គ្រាប់ក្នុង 438 ប្រកួត។

ដោយសារតែប្រវត្តិសាស្ត្រដ៏អស្ចារ្យនេះ អ្នកគាំទ្រជាច្រើនកំពុងរង់ចាំមើលថា តើ Ronaldo Jr. អាចដើរតាមជំហានឪពុក និងក្លាយជាតារាបាល់ទាត់ធំម្នាក់ទៀតបានឬអត់។